वीरगञ्ज । वीरगञ्ज महानगरपालिकाले आइतवारदेखि पिछडिएको वडाबाट निःशूल्क अनलाईनमार्फत राजस्व बुझ्ने कार्यको शुरुवात गरेको छ । वीरगञ्ज महानगरपालिका वडा नम्बर २९ बसडिलवाबाट उक्त कार्यको शुरुवात गरिएको हो ।

वीरगञ्ज महानगरपालिकामा पछि गाभिएका वडाहरु शहर क्षेत्रभन्दा टाढा रहेको हुँदा राजस्व तिर्न समय र पैँसा खर्च भइरहेको अवस्थालाई मध्यनजर गर्दै अनलाईनबाटै तिर्न सकिने व्यवस्था गरिएको वीरगञ्ज महानगरपालिकाका नगरप्रमुख विजय कुमार सरावगीले बताए ।

अबदेखि वडा नम्बर २९ का वासिन्दालाई सम्पती कर, घर जग्गा घर, नक्सा पासको शूल्क, सिफारिस शुल्क लगायतका सम्पूर्ण कर अनलाईनबाटै तिर्न सक्ने छन् । वीरगञ्ज महानगरपालिकाका अन्य ग्रामिण क्षेत्रका वडाहरुमा पनि छिटै अनलाईन मार्फत राजस्व शूल्क लिने व्यवस्था गरिने मेयर सरावगीले बताए ।

५० रुपैँयाको राजस्व तिर्न ५ सय रुपैयाँ खर्च गरेर पुरै दिन लगाएर आउँदा नागरिकलाई समस्या हुनुका साथै अन्य कामकाजहरु पनि प्रभावित हुने हुँदा अनलाईन कर तिर्ने व्यवस्था गरिएको नगरप्रमुख सरावगीको भनाइ छ ।