वीरगञ्ज । वीरगञ्जमा जेठ ७ गतेदेखि चिनियाँ खोप ‘भेरोसेल’ को दोस्रो लगाउने योजना छ । कोरोना भाइरसविरुद्धको चिनियाँ खोप (भेरोसेल) को दोस्रो डोज वीरगञ्जमा जेठ ७ गतेदेखि लगाईने तयारी भइरहेको छ ।आइतवारदेखि काठमाण्डौ उपत्यकामा लगाउन शुरु भएको खोप वीरगञ्जमा यही ७ गतेदेखि शुरु हुने भनेपनि अहिलेसम्म खोप नआएको जनस्वास्थ्य कार्यालय पर्साका स्वास्थ्य निरिक्षक जयमोद ठाकुरले बताए ।

पहिलो डोज खोप लगाएका व्यक्तिले आफू निकट पालिका, वडा र खोप केन्द्रमा गएर दोस्रो डोज खोप लगाउन सक्ने वागमती प्रदेश सरकारको सामाजिक विकास मन्त्रालयले जारी गरेको सूचनामा उल्लेख छ । काठमाडौ महानगरपालिकाका ३२ वटा वडासहित अन्य नगरपालिकामा १–२ वटा खोप केन्द्र तय गरेको छ ।

सूचनाअनुसार चैत २५, २६, २७ र २८ गते भेरोसेलको पहिलो डोज लगाएकाले जेठ २ गते, चैत २९ र ३० गते लगाएकाले ३ गते, चैत ३१ र वैशाख २ गते खोप लगाएकाले जेठ ४ गते, वैशाख ३ र ४ गते लगाएकाले जेठ ५ गते, वैशाख ५ र ६ गते खोप लगाएकाले जेठ ६ गते दोस्रो डोज लगाउन सक्नेछन् । यस्तै, वैशाख ७, ८, ९ र १० गते पहिलो खोप लगाएकाहरुले जेठ ७ गते, वैशाख ११ र १२ गते लगाएकाले जेठ ८ गते, वैशाख १३ गते पहिलो डोज लिएकाले जेठ ९ गते, बैशाख १४ गते पहिलो डोज लिएका व्यक्तिहरुले जेठ १० गते र वैशाख १५ गते पहिलो डोज लिएकाले जेठ ११ गते दोस्रो डोज लगाउन सक्ने जनाइएको छ ।

काठमाडौंमा संक्रमण फैलिरहेको अवस्थामा धेरै भिडभाड हुन नदिन यस पटक काठमाडौंमा करीब ५० वटा खोप केन्द्रहरुको व्यवस्था गरिएको बताइएको छ । दोस्रो डोज लिन जाँदा पहिलो डोज लगाउँदा दिइएको खोप कार्ड अनिवार्य रुपमा लग्नु पर्नेछ ।