वीरगंज संजालवीरगंज। प्राध्यापक डाक्टर गोविन्द केसीको माग पूरा गरी जीवन रक्षा गर्न भन्दै वीरगञ्जका सचेत नागरिकले आज तेस्रो दिन पनि घण्टाघरमा प्रदर्शन गरेका छन् ।
सचेत नागरिक समाजमा गोलबद्ध चिकित्सक, अधिकारकर्मी, विभिन्न सामाजिक संघ संस्था र राजनीतिक दलमा आवद्ध व्यक्तिहरुले डाक्टर केसीमा समर्थनमा प्रदर्शन गरेका हुन् ।
नेपाली जनताको स्वास्थ्यका अभिभावक डाक्टर केसीले स्वास्थ्य क्षेत्र एवम् शिक्षा क्षेत्रको बेतिथि र सुधारको लागि गर्नुभएको १९ औं सत्याग्रह अनसनको समर्थनमा ऐक्यबद्धता जनाउँदै सचेत नागरिक समाजले आजको प्रदर्शन गरेको समूहमा आवद्ध अभियानकर्ता एवम् युवा नेता ओमप्रकाश सर्राफले बताए । उनले डाक्टर केसीको जायज माग पूरा गर्न सरकारलाई दबाव दिने उद्देश्यले प्रदर्शन गरिएको बताए ।
प्रदर्शनमा सहभागीहरुले डाक्टर केसीका माग पूरा गर, डाक्टर केसीको अनशन माफियालाई टेनसन, लुटतन्त्र बन्द गर, डा. केसीको जीवन रक्षा गर, कर्णालीमा अविलम्ब एमबिबिएसको पढाई सुरु गर, अख्तियारमाथिको हस्तक्षेप बन्द गर, दलीय भागबन्डा बन्द गर लगायतका नारा लेखिएका प्लेकार्ड बोकेर प्रदर्शन गरेका थिए ।
डाक्टर केसीको माग पूरा नहुन्जेल समूहले प्रत्येक दिन बिहान ७ बजे निरन्तर प्रदर्शन जारी राख्ने युवा नेता सर्राफले जानकारी दिए ।
