वीरगंज। बितेको २४ घण्टामा रुपन्देहीमा रहेका विभिन्न अस्पतालमा उपचाररत ४ जना कोरोना संक्रमितको मृत्यु भएको छ । लुम्बिनी प्रदेशिक अस्पताल, कोरोना विशेष अस्पताल बुटवल र भैरहवाको भीम अस्पतालमा उपचाररत ४ जनाको कोरोना संक्रमणबाट मृत्यु भएको हो ।लुम्बिनी प्रादेशिक अस्पतालको कोरोना विशेष अस्पतालमा उपचाररत एक संक्रमित महिलाको मृत्यु भएको छ ।

बुटवल ११ की ७२ वर्षकी महिलाको सोमबार बेलुका साढे ७ बजे मृत्यु भएको अस्पतालका सूचना अधिकारी डा.विष्णु गौतमले जानकारी दिए ।  उनका अनुसार १० भदौमा अस्पतालमा भर्ना भएकी उनको ११ गतेदेखि भेन्टिलेटरमा राखेर उपचार जारी थियो । सोमबारै बिहानै कपिलवस्तु शिवराज नगरपालिकाका २ जना र सिद्धार्थनगरका १ जना गरी ३ जनाको रुपन्देहीमा उपचारका क्रममा मृत्यु भएको थियो ।

भीम अस्पताल भैरहवामा उपचाररत कपिलवस्तुस्थित शिवराज नगरपालिका ५ का ५८ वर्षीय पुरुषको मृत्यु भएको अस्पतालले जनाएको छ । लुम्बिनी प्रादेशिक अस्पतालको कोरोना विशेष अस्पताल बुटवलमा शिवराज ५ कै ४७ वर्षीया महिलाको  मृत्यु भएको थियो । त्यस्तै लुम्बिनी प्रादेशिक अस्पताल बुटवलका अनुसार सिद्धार्थनगर नगरपालिका ५ की ६४ वर्षीया महिलाको दिउँसो मृत्यु भएको  छ ।

अस्पतालको फिभर क्लिनिकमा आएर पीसीआर जाँच गराएकी उनमा ज्वरो र स्वासप्रश्वासको समस्या देखिएको थियो । उनी अस्पताल आउँदा ज्वरोले सिकिस्त थिइन् । उनलाई अस्पतालमा भर्ना गरेर उपचार थालिएको केहीबेरमा मृत्यु भएको अस्पतालका सूचना अधिकारी डा.विष्णु गौतमले जानकारी दिए । उनको रिपोर्ट पोजेटिभ आएको उनले बताए ।