मुम्बई । जुलाई ११ मा कोरोना पोजेटिभ भएपछि अस्पतालमा उपचार्थ अमिताभ बच्चनको पछिल्लो रिपोर्ट नेगेटिभ आएको छ । कोरोना परिक्षण नेगेटिभ आएसँगै बच्चन अस्पतालबाट डिस्चार्ज भएका छन् । अमिताभका छोरा तथा अभिनेता अभिषेक बच्चनले ट्विट गर्दै यस कुराको जानकारी दिएका हुन् ।

उनले लेखेका छन्,“ धन्य, मेरो बुबाको पछिल्लो कोरोना परिक्षण रिर्पोट नेगेटिभ आएको छ । उनको डिस्चार्ज भइसकेको छ र अब उहाँ घरमै आराम गर्नुहुनेछ । तपाईको माया र प्रार्थनाका लागि धन्यवाद ।”

उनले अर्को ट्विट गर्दै आफू भने अझै अस्पतालमै हुने जानकारी दिए,“दुर्भाग्यवश मेरो रिर्पोट पोजेटिभ नै आएको हुनाले म भने अस्पतालमै हुने छु । मेरो परिवारका लागि तपाईंहरुले दिनुभएको माया र प्रार्थनाको लागि फेरि पनि तपाईहरु सबैलाई धन्यवाद । म यस्लाई हराएर फेरि स्वास्थ हुने छु यो मेरो बाचा छ ।”अमिताभका बुहारी ऐश्वर्या र नातिनी आराध्या भने गत साता नै रिर्पोट नेगेटिभ आएर घर फर्किसकेका छन् ।