वीरगन्ज | वीरगन्ज महानगरपालिकाका मेयर राजेशमान सिंहले वीरगन्जको घण्टाघरमा महानगरपालिकाले जडान गरेको ट्राफिक लाइट लामोसमयदेखि सञ्चालनमा नआएको प्रति आक्रोश व्यक्त गरेका छन् ।

जिल्ला ट्राफिक प्रहरी कार्यालय पर्साको आयोजनामा एक सातासम्म सञ्चालित “सडक अनुशासन पालना तथा दुर्घटना न्यूनीकरणका लागि ट्राफिक जनचेतनामूलक सप्ताह कार्यक्रम २०८२“ को बुधबार आयोजित समापन समारोहमा बोल्दै मेयर सिंहले ट्राफिक लाइट लामोसमयदेखि सञ्चालनमा नआएको प्रति आक्रोश व्यक्त गरेका हुन् ।

कार्यक्रममा सहभागी जिल्ला ट्राफिक प्रहरी कार्यालय पर्साका प्रमुखलाई लक्षित गर्दै मेयर सिंहले भने,‘ महानगरपालिकाले खर्च गरेर ट्राफिक लाइट जडान गरिदिएको महिनौ भइसक्यो । तरअहिलेसम्म ट्राफिक प्रहरीले त्यसलाई सञ्चालनमा ल्याउन सकेको छैन । जसको अपजस मैले खानु परिरहेको छ ।’

त्यसका कारण उक्त ट्राफिक लाइट यथाशीघ्र सञ्चालनमा ल्याउन उनले ट्राफिक प्रहरी प्रमुखसंग आग्रह गरे । मेयर सिंहले भने,‘ वीरगन्जमा ट्राफिक प्रहरीले ट्राफिक सप्ताह मनाइरहदा सामाजिक सञ्जालमा घण्टाघरको ट्राफिक लाइटको विषयलाई लिएर जनताले मलाई व्यंग्य गरिरहेका थिए । जनताको त्यो व्यंग्य जायज नै थियो ।’

यदि ट्राफिक लाइट सञ्चालनमा ट्राफिक प्रहरी कार्यालयसंग जनशक्तिको कमी भए महानगरपालिकाले आफ्ना नगर प्रहरी सहयोगीका रुपमा उपलब्ध गराउन तयार रहेकोपनि उनले बताए । घण्टाघरको ट्राफिक लाइट सञ्चालनमा ल्याउन सके त्यसले ट्राफिक नियमको उल्लंघन गरिरहेकाहरु कारबाहीको दायरमा आउने र शहरमा सवारी दुर्घटनाामा कमीपनि आउने मेयर सिंहले बताए । वीरगन्जका अन्य चोकमापनि महानगरपालिकाले ट्राफिक लाइट जडान गर्ने सोचमा रहेको उनले बताए ।

पर्साका प्रहरी उपरीक्षक गौतम मिश्रको अध्यक्षता तथा वीरगन्ज महानगरका मेयर सिंहको प्रमुख आतिथ्यतामा भएको समापनन कार्यक्रममा उपमेयर इम्तियाज आलम, पर्साका सहायक प्रमुख जिल्ला अधिकारी सुमन कार्की, वीरगन्ज् महानगरपालिकाका प्रमुख प्रशासकीय अधिकृत अरबिन्दलाल कर्ण , नेपाल पत्रकार महासंघ मधेस प्रदेशका अध्यक्ष श्याम बन्जारा, वीरगन्ज उद्योग वाणिज्य संघका अध्यक्ष हरि गौतम, सशस्त्र प्रहरी उपरीक्षक राधेश्याम धिमाल, प्रहरी नायब उपरीक्षक किशोर लम्साल, ट्राफिक प्रहरी निरीक्षक लोकराज भट्ट लगायतकाकोपनि सहभागिता थियो ।