वीरगन्ज । नेपाल सरकारको औषधि मूल्य निर्धारण समितिले पेश गरेको प्रतिवेदनको विरोधमा वीरगन्जमा औषधि उत्पादक, व्यवसायी तथा पसलेहरूले मुखमा कालो पट्टी बाँधेर धर्ना दिएका छन्।
शुक्रबार बिहान ११ बजेदेखि दिउँसो १ बजेसम्म औषधि व्यवस्था विभाग शाखा कार्यालय, वीरगन्ज अगाडि देशव्यापी विरोध कार्यक्रमअन्तर्गत उनीहरूले धर्ना दिएका हुन्। उनीहरूले सिफारिस समितिको प्रतिवेदनले न त उत्पादक, न व्यवसायी, न उपभोक्तालाई राहत दिने भन्दै नेपाल उपयुक्त नीति बनाउन सरकारसँग माग गरे।
वीरगन्ज उद्योग वाणिज्य संघका अध्यक्ष हरि गौतमले समितिको एकपक्षीय निर्णयले देशभरका औषधि उद्योगहरू धराशायी हुने खतरा रहेको बताए। नेपाल औषधि उत्पादक संघका वरिष्ठ उपाध्यक्ष प्रभात रुंगटाले औषधि ऐन २०७५ लागू नगरी नयाँ नीति ल्याउने प्रयासप्रति असन्तुष्टि जनाए।
नेपाल औषधि व्यवसायी संघ पर्साका वरिष्ठ उपाध्यक्ष विश्वराज गौतमले औषधि उद्योग र व्यवसायीमैत्री नीति बनाउन सरकारलाई आग्रह गरे।
व्यवसायीहरूले प्रतिवेदन लागु भए एक महिनाभित्र औषधिको अभाव हुने चेतावनी दिएका छन्। साथै, मूल्य निर्धारण, वितरण प्रणाली सुधार, गुणस्तर, आपूर्ति र व्यवस्थापनसम्बन्धी सिफारिसहरू तत्काल कार्यान्वयन गर्न आग्रहसमेत गरेका छन्।
