वीरगन्ज | एक हप्तायता वीरगन्जसहित देशभर गर्मी अचाक्ली बढेको छ ।पर्सा, बारा सहित तराई–मधेसका जिल्लामा दिउँसोको समयमा तातो हावा चल्न थालेको छ ।वीरगन्ज,जनकपुर, नेपालगञ्ज, भैरहवा, धनगढीमा तापक्रम ४० डिग्री सेल्सियसभन्दा माथि पुगेको छ ।

वीरगन्जमा हिजो आइतबार दिउँसो तापक्रम ४२ डिग्री सेल्सियसभन्दा पनि बढी पुगेको थियो । यस्तै जनकपुरमा ४० , भैरहवामा ४३ दशमलव ६, नेपालगञ्जको ४२ दशमलव २ र धनगढीको ४२ दशमलव २ डिग्री सेल्सियस पुगेको थियो । आजदेखि तापक्रम अझै बढ्ने सम्भावना रहेको मौसमविद् गोविन्द झाले बताऐ ।

तराई–मधेसकाका विभिन्न ठाउँमा तातो हावा चलेर तापक्रम ’लु’ को अवस्थामा पुगे पनि जल तथा मौसम विज्ञान विभागले लु’ चलेको आधिकारिक घोषणा गरिसकेको छैन ।सामान्यतया लगातार तीन दिन वा त्योभन्दा धेरै समयसम्म असामान्य रूपमा तापक्रम बढ्दा लु’ चलेको घोषणा गरिन्छ ।

यसको निश्चित मापदण्ड नभए पनि निरन्तर तापक्रम ४० डिग्रीभन्दा माथि पुग्यो भने ‘लु’ चलेको घोषणा गर्ने गरिएको मौसमविद् झाले बताए । तत्काल पानी पर्ने सम्भावना नभएकाले देशभरको तापक्रम अझ बढ्न सक्ने उनको भनाइ छ ।

एक साता यता गर्मी अचाक्ली बढेपछि सबै भन्दा बढी खुल्ला स्थानमा दैनिक ज्यालामजदु्री गर्नेहरु समस्यामा परेका छन् । खासगरी शहर बजारमा रिक्सा ठेला चलाउने, घरनिर्माणको काम गर्ने मजदुरहरुलाई अहिलेको गर्मीमा निक्कै सास्ती भइरहेको छ ।

बिहान देखि नै चर्को घाम लाग्दै आएका कारण सडक तथा बजारमा मानिसहरुको चहल पहल पनि कम देखिएको छ ।चर्को गर्मी र प्रचण्ड घामका कारण खास गरि दैनिक ज्यलादारीमा काम गर्ने मजदुरहरुलाइ बढि सास्ती भएको छ । त्यसै गरि ग्रामीण क्षेत्रमा खेतमा काम गर्ने कृषि मजदुर तथा शहर बजारमा रिक्सा र ठेला चलाउने मजदुरहरुको जनजीवन पनि गर्मीका कारण कष्टकर बनेको छ ।

बिहानै देखि चर्को घाम लाग्ने गरेकाले दिउँसोको समयमा बजारमा यात्रु समेत पाउन छाडेको वीरगन्जमा तीन वर्ष देखि रिक्सा चलाउदै आएका भारत बैरगनीयाका महिन्द्र महत्ताले बताए । घाममा रिक्सा चलाउन गाह्रँे त छदैछ ,चलाएपनि दिउँसोको बेला यात्रु पाइदैन , उनले भने ,‘गर्मीमा कमाइ नै मरेको छ ।दिउँसो चर्को घाम लाग्ने गरेकाले बिहान र बेलुकी मात्रै रिक्सा चलाउने गरेको उनले बताए ।
अत्याधिक गर्मीका कारण अस्पताल र नीजी स्वास्थ्य क्लिनीकहरुमा बिरामीको चाप पनि बढ्न थालेको छ । वीरगन्जको नारायणी अस्पतालमा पछिल्ला दिनमा बिरामीको चाप बढेको अस्पतालका डाक्टर उदयनारायण सिंहले जानकारी दिए । अहिलेको गर्मीको समयमा विशेष गरि बालबालिकाहरुमा झाडा पखाला, ज्वरोको समस्या देखिएको छ ।

गर्मीको समयमा पातलो कपडा लगाउन र पानी तथा झोलयुक्त खाना बढी सेवन गर्न चिकित्सकहरुले सुझाव दिएका छन् । गर्मीबाट बच्नको लागि बिहान बेलुका मात्र घर बाहिर निस्किने , सकेसम्म दिउँसो चर्को घाम लागेका बेला घरबाट बाहिर निस्किने ,निस्कनै परे पूरा शरिर ढाक्ने गरी कपडा लगाउने र छाताको प्रयोग गर्ने, चिसो र रसिलो तरल पदार्थहरु बढी सेवन गर्नु पर्ने डाक्टरहरुको सुझाव छ ।

गण्डकी, कर्णाली र सुदूरपश्चिम प्रदेशका पहाडी भूभागका थोरै ठाउँमा तथा कोशी र बागमती प्रदेशको पहाडी भूभागका एक, दुई ठाउँमा मेघगर्जन र चट्याङ्गसहित हल्का वर्षाको सम्भावना रहेको मौसम पूर्वानुमान महाशाखाले जनाएको छ ।

महाशाखाकाअनुसार आज मधेस प्रदेशका केही ठाउँ तथा कोशी र लुम्बिनी प्रदेशका तराई–मधेस भूभागका थोरै ठाउँमा हावाहुरीको सम्भावना रहेको छ ।

Share this: