मुम्बई । भारतको मुम्बईस्थित जुहू क्षेत्रमा बलिउड अभिनेता टाइगर श्रॉफको गाडीमाथि अज्ञात व्यक्तिहरूले गोली प्रहार गरेका छन्। घटनामा उनका कार चालक घाइते भएका छन्। गोली चालकको बायाँ हातमा लागेको प्रारम्भिक जानकारी प्राप्त भएको छ।
प्राप्त विवरणअनुसार, मोटरसाइकलमा आएका अज्ञात आक्रमणकारीहरूले टाइगर श्रॉफको गाडीलाई लक्षित गरी चारदेखि पाँच राउन्ड गोली प्रहार गरेका थिए। गोली प्रहारपछि आक्रमणकारीहरू मोटरसाइकलमै चढेर फरार भएका थिए।
घटनामा टाइगर श्रॉफलाई गोली नलागेको मुम्बई प्रहरीले जनाएको छ। चालकलाई गोली लागेपछि अभिनेता श्रॉफ आफैंले गाडी चलाएर उनलाई उपचारका लागि अस्पताल पुर्याएको बताइएको छ।
घटनापछि प्रहरीले अनुसन्धान तीव्र बनाएको छ। आक्रमणकारीको पहिचान तथा घटनाको कारण पत्ता लगाउन १५ वटा विशेष प्रहरी टोली परिचालन गरिएको जानकारी प्राप्त भएको छ। प्रहरीले घटनास्थल आसपासका सीसीटीभी फुटेजका आधारमा अनुसन्धान अघि बढाइरहेको छ।
अभिनेताको गाडीमाथि भएको गोली प्रहारको घटनाले मुम्बईको सुरक्षा व्यवस्थाबारे चासो बढाएको छ। प्रहरीले घटनामा संलग्न व्यक्तिहरूको खोजी तथा घटनाको वास्तविक कारण पत्ता लगाउने प्रयास गरिरहेको छ।
