अमेरिकाको मायामी अन्तर्राष्ट्रिय विमानस्थलमा जहाज अवतरणको क्रममा धावनमार्ग भन्दा बाहिर पुग्दा पाँच जनाको मृत्यु भएको छ।
आइतबार मायामीस्थित २१ एयर एलएलसीले सञ्चालन गरेको ३२ वर्ष पुरानो बोइङ ७६७-३३ए विमान धावनमार्गबाट करिब १,३०० फिट (३९६ मिटर) बाहिर पुगेपछि दुर्घटनाग्रस्त भएको रोयटर्सले जनाएको छ।
जहाज धावनमार्गबाट बाहिर पार्किङमा रहेका दुई वटा गाडीसँग ठोक्किन पुगेको हो।
दुर्घटनामा घाइते रहेका पाँच जनामध्ये तीन जना गम्भीर छन्।
अमेरिकी राष्ट्रिय यातायात सुरक्षा बोर्ड (एनटीएसबी) का अनुसन्धानकर्ताहरूले दुर्घटनाग्रस्त भएको अमेजन प्राइम एयरको कार्गो विमानबाट फ्लाइट डाटा रेकर्डर र ककपिट भ्वाइस रेकर्डर बरामद गरेको छ।
एनटीएसबीकी अध्यक्ष जेनिफर होमेन्डीले ‘ब्ल्याक बक्स’ भनेर चिनिने ती दुई उपकरणलाई परीक्षणका लागि सोमबार राति वासिङ्टनस्थित बोर्डको मुख्यालयमा पठाइएको बताइन्।
अमेजनको उक्त कार्गो विमान त्यस दिनको तेस्रो उडानमा थियो। विमान पोर्टो रिकोको सान हुआनबाट मायामीतर्फ आइरहेको थियो।
होमेन्डीका अनुसार दुर्घटनाअघि आइतबार विमानले सिनसिनाटीबाट मायामी र त्यसपछि मायामीबाट सान हुआनसम्म उडान गरेको थियो। दुर्घटना स्थानीय समयअनुसार आइतबार दिउँसो १:५३ बजे भएको थियो।
