वीरगञ्ज । वीरगञ्जमा खाना पकाउने एलपी ग्यासको चरम अभाव देखिएको छ । ग्यास सिलिन्डर लिन बिहानैदेखि डिलरको गोदाममा लामो लाइन लागे पनि घण्टौँसम्म पालो कुर्दा समेत धेरै उपभोक्ता ग्यास नपाई खाली हात फर्किन बाध्य भएका छन् ।

स्थानीय डिलरहरूका अनुसार पछिल्ला केही सातादेखि ग्यासको आपूर्ति मागअनुसार हुन नसक्दा उपभोक्तालाई नियमित रूपमा ग्यास उपलब्ध गराउन कठिनाइ भइरहेको छ । सीमित परिमाणमा ग्यास आइरहेकाले सबै उपभोक्तालाई वितरण गर्न नसकिएको उनीहरूको भनाइ छ ।

ग्यास अभावका कारण दैनिक खाना पकाउन समस्या भएको भन्दै उपभोक्ताले सम्बन्धित निकायको ध्यानाकर्षण गराएका छन् । उनीहरूले बजारमा ग्यासको आपूर्ति सहज बनाउन तत्काल प्रभावकारी कदम चाल्न माग गरेका छन् ।