वीरगंज | यसै साताबाट नेपाल भारत सीमा क्षेत्रका विभिन्न ६ वटा नाकामा आफ्नो ‘बोर्डर इन्टरयाक्शन टीम’ले काम थालेको भन्दै सशस्त्र प्रहरी बलका प्रवक्ताले त्यसले तेस्रो देशका नागरिकहरूको सम्भावित घुसपैठ नियन्त्रणमा पनि भूमिका खेल्ने बताएका छन्।
अघिल्लो साता राष्ट्रियसभा अन्तर्गतको सङ्घीयता सबलीकरण तथा राष्ट्रिय सरोकार समितिको बैठकमा बोल्दै नेपाल प्रहरीका महानिरीक्षक दानबहादुर कार्कीले रोहिंज्या, पाकिस्तानी र सोमालियाली शरणार्थीका कतिपय क्रियाकलाप ‘सुरक्षा संवेदनशीलता’ उत्पन्न गराउने किसिमको भएको बताएका थिए।
त्यसपछि बीबीसीसँग कुरा गर्दै सुरक्षा निकायका अधिकारीहरूले कतिपय ठाउँमा परिचयपत्र जाँच गर्ने गरिएका र प्रविधिमा आधारित निगरानी प्रणाली समेत अवलम्बन गरिएको बताए।
नेपाल प्रहरीका प्रवक्ताले सुराकीमा आधारित प्रहरी निगरानीलाई सुदृढ बनाइएको भन्दै विभिन्न निकायसँग समन्वय गरिरहेको जनाएको छ।
