काठमाडौं । स्वास्थ्य तथा जनसंख्या मन्त्रालयले स्वास्थ्यकर्मी र कर्मचारीका निम्ति सुरक्षित कार्यस्थल बनाउन चार काम थालेको छ । यही असोज १३ गते चिकित्सकसँग भएको सहमतिबमोजिम काम सुरु गरिएको मन्त्रालयले जनाएको छ ।

स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन, २०७९ लाई संशोधन गर्न मन्त्रालयको कानुन शाखाले प्रक्रिया अघि बढाउने भएको छ ।

यस्तै, चिकित्सक, आवासीय चिकित्सक, मेडिकल अधिकृत, इन्टर्न डाक्टर र अरू स्वास्थ्यकर्मीको सेवा सुविधामा न्यूनतम सरकारीसरह एकरूपता कायम गर्ने प्रक्रिया पनि सुरु गरिएको मन्त्रालयले जनाएको छ ।

सो कामको जिम्मेवारी नीति, योजना तथा अनुगमन महाशाखालाई दिइएको छ । स्वास्थ्यकर्मीमाथि आक्रमणका घटनाको कारकतत्त्व पहिचान र निराकरण गर्न नीतिगत र कानुनी सुधारका विषय समेटी महाशाखाको टोलीले प्रतिवेदन पेस गर्नेछ ।

स्वास्थ्यकर्मी र स्वास्थ्य संस्थाको सुरक्षा समन्वय समितिको बैठक हरेक १५ दिनमा बस्ने निर्णय पनि गरिएको छ ।