वीरगंज । सर्लाहीमा जलाउन लागिएको एक विवाहिता युवतीको शव प्रहरीले चिताबाट नियन्त्रणमा लिएको छ । प्रहरीले अनुसन्धानका लागि मृतक युवततीका पति, ससुरा र देवरलाई पनि नियन्त्रणमा लिएको छ । सर्लाहीको रामनगर गाउँपालिका–१ खैर्वा बस्ने सुनिल साहकी श्रीमती वर्षिया मनिषा साहको शव जलाउन लागेको अवस्थामा शंका लागेर चिताबाटै नियन्त्रणमा लिएको हो ।
ती युवतीको शंकास्पद मृत्युको सूचना पाए लगतै नजिकको मनुष्मारा खोलामा बुधबार दिउँसो जलाउन ठिक्क परेको अवस्थामा शव नियन्त्रणमा लिइएको प्रहरी उपरीक्षक नरेशराज सुवेदीले जानकारी दिए । उनका अनुसार मृतक युवतीको घाँटीमा निलडाम देखिएको छ । मृतकका पति सुनिल, ससुरा रामेश्वर र देवर रामबाबुलाई पक्राउ गरी जिल्ला प्रहरी कार्यालयको हिरासतमा राखेर अनुसन्धान गरिरहेको सुबेदीले बताए ।
परिवारका सदस्यले भने छारे रोगकी बिरामी मनिषाले आत्महत्या गरेको दाबी गरेका छन् । तर प्रहरीले भने पासो लागेर आत्महत्या गरेको जस्तो देखिएको भएपनि संकलित प्रमाणको आधारमा घटनाको अनुसन्धान भइरहेको जनाएको छ । थप कुरा पोस्टमार्टमपश्चात खुल्ने पप्रहरीको भनाई छ । सर्लाहीकै कविलासी गाउँपालिका–३ घर माइत भएकी मनिषाको केही वर्ष पहिले विवाह भएको थियो ।माइती पक्षले भने पतिसहित परिवारका सदस्य मिलेर मनिषाको हत्या गरेको आरोप लगाएका छन् ।
