वीरगंज | युरोपको पश्चिमी भागमा चर्को गर्मीका कारण जुन महिनाको अन्त्यतिर १० हजार भन्दा बढीको मृत्यु भएको छ।

आधिकारिक तथ्याङ्कले अरू वर्षमा हुने मृतकको संख्याभन्दा यस वर्षको जुनमा थप १० हजार भन्दा बढी व्यक्तिको मृत्यु भएको देखायो भनेर समाचार संस्था रोएटर्सले जनाएको छ।

यसरी ज्यान गुमाउने मध्ये ९ हजार भन्दा बढी ६५ वर्ष र त्यसभन्दा माथिल्लो उमेर समूहका रहेको युरोपियन सेन्टर फर डिजिज प्रिभेन्सन एन्ड कन्ट्रोल र विश्व स्वास्थ्य सङ्गठनको सहयोग प्राप्त नेटवर्क युरोमोमोद्वारा प्रकाशित तथ्याङ्कले देखाएको छ।

अत्यधिक गर्मीले ‘हिट स्ट्रोक’ हुने वा मुटु र श्वासप्रश्वास सम्बन्धी रोगहरूलाई थप जटिल बनाएर मानिसको ज्यान लिन सक्छ। यस्तो जोखिम सबैभन्दा बढी वृद्ध वृद्धाहरूलाई हुन्छ।

२७ युरोपेली देशहरूको राष्ट्रिय मृत्युदरको तथ्याङ्कलाई संकलन गरी तयार पारिएको यो विवरणमा जुन २२ देखि २८ को हप्तामा केवल गर्मीका कारण भएका मात्र नभएर सबै कारणले भएका थप मृत्युहरू समावेश छन्। सो हप्ता फ्रान्स, स्पेन, बेलायत र अन्य देशहरूमा गर्मी उच्च बिन्दुमा पुगेको थियो।

तर वैज्ञानिकहरूका अनुसार त्यस हप्तामा अत्यधिक मृत्युको सङ्ख्या १०,६५० पुग्नुमा कोभिड-१९ को प्रकोप जस्ता अन्य कुनै ज्ञात ठुला कारकहरूको भूमिका थिएन।

जुनको अन्त्यतिरको अत्याधिक गर्मीको लहर मानव-सिर्जित जलवायु परिवर्तन बिना लगभग असम्भव जस्तै भएको वैज्ञानिकहरूले भनेका छन्।

यसअघि यो वर्ष जर्मनीमा मात्रै गर्मीका कारण अनुमानित ५,१२० जनाको मृत्यु भएको समाचार आएको थियो। त्यसमध्ये अधिकांशको मृत्यु जुन महिनाको अन्त्यतिर भएको समाचार संस्था रोएटर्सले जनाएको थियो।

चिसो हावापानी भएको जर्मनीमा औसत तापक्रम २० डिग्री सेल्सियसभन्दा धेरै माथि पुगेको भनेर सार्वजनिक स्वास्थ्यका लागि रोबर्ट कोच इन्स्टिच्युटले केही दिन अघि बताएको थियो।

इन्स्टिच्युटले आफ्नो साप्ताहिक प्रतिवेदनमा जनाए अनुसार मृत्यु हुनेमध्ये करिब ४ हजार २७० जना ७५ वर्ष र सोभन्दा माथिका थिए।

पुरुषको तुलनामा महिलाको बढी मृत्यु भएको छ। त्यसको मुख्य कारण वृद्ध जनसंख्यामा महिलाहरूको हिस्सा बढी हुनु हो।