वीरगंज । पाकिस्तानका पूर्व प्रधानमन्त्री इमरान खानविरुद्ध पक्राउ पुर्जी जारी भएको छ । खानविरुद्ध तहरीक-ए-इन्साफ (पीटीआई)का अध्यक्षसमेत रहेका खानविरुद्ध त्यहाँको निर्वाचन आयोगले अवहेलना मुद्दामा गैरजमानती वारेन्ट जारी गरेको हो । स्थानीय समाचार एजेन्सी डनका अनुसार आयोगले इस्लामवाद प्रहरीलाई मङ्गलवार पक्राउ गरी पेस गर्न निर्देशन दिएको छ ।

गत वर्ष अप्रिलमा विश्वासको मत नपाएपछि खान प्रधानमन्त्रीबाट पदमुक्त भएका थिए । उनी विरुद्ध आतङ्कवादसहित १५० बढी मुद्दा लगाइएको थियो । सोमबार पाकिस्तानको सर्वोच्च अदालतले अर्को एक मुद्दामा उनलाई जमानत दिएको थियो । निर्वाचन आयोगले पहिलेको सूचना र जमानती वारेन्टलाई अवहेलना गरी उपस्थित नभएको आरोप लगाएको छ । आयोगविरुद्ध अभद्र भाषा प्रयोग गरी अवहेलना गरेको आरोप उनलाई छ ।

१० बजे पक्राउ गरी उपस्थित गराउन इस्लामवाद प्रहरीलाई आदेश दिइएकाले उनी आजै पक्राउ पर्न सक्ने बताइएको छ । दुई महिनाअघि खानलाई पक्राउ गरिएपछि पाकिस्तानमा उनका समर्थकले प्रदर्शन गरेका थिए । उनलाई सुरक्षा बलले इस्लामवाद उच्च अदालत बाहिरबाट पक्राउ गरिएको थियो । इस्लामवादको जमान पार्कमा प्रहरी र प्रदर्शनकारीबिच झडप भएको थियो। पछि अदालतले उनलाई रिहा गर्न आदेश दिएको थियो ।