वीरगंज । वीरगन्जमा चापाकलहरु सुकेर उत्पन्न पानीको चरम समस्या तत्कालका लागि समाधान गर्नका लागि महानगरपालिकाले शहरी क्षेत्रका वडाहरुको सार्र्वजनिक स्थानमा खानेपानी संस्थानको धाराहरु निःशुल्क जडान गर्ने भएको छ । महानगरका मेयरको कार्यकक्षमा शुक्रबार दिउँसो मेयर राजेशमान सिंह र खानेपानी संस्थान शाखा कार्यालय वीरगन्जका प्रमुख निरण महर्जनसमेतको सहभागीतामा बसेको बैठकमा यस्तो निर्णय गरिएको मेयर सिंहका स्वकीय सचिव सत्यराज घिमिरेले जानकारी दिए ।

शहरी भेगका १८ वटा वडा ( वडा नम्बर १ देखि १७ र १९ नम्बर वडा ) हरुमा आवश्यकता अनुसार १० देखि १५ वटा खानेपानी संस्थानको धारा जडानको काम शनिबार या आइतबारदेखि नै सुरु गर्ने निर्णय भएको जानकारी उनले दिए । महानगरको वडा नम्बर १ देखि १७ र १९ नम्बर वडागरि १८ वटा वडाहरुमा अहिले सबैभन्दा बढि पानीको समस्या देखिएकाले ती प्रत्येक वडाको सार्वजनिक स्थानमा १० देखि १५ वटा धारा जडानको काम तत्कालै सुरु गर्ने निर्णय भएको घिमिरेले बताए ।

संस्थानले धारा जडानको काम शनिबार या आइतबारदेखि नै थालि हाल्ने र धारा जडानमा लाग्ने सबै खर्च र त्यसको महशुल महानगरपालिकाले तिर्ने सहमति भएको जानकारी उनले दिए । खानेपानी संस्थानको पानी आपुर्ति गर्ने पाइप लाइन नभएका ग्रामीण भेगका लगायतका वडाहरुमा भने यसअघिदेखि ट्याङकरबाट पानी वितरण गर्दै आएको सेवालाई पनि निरन्तरता दिने निर्णयपनि भएको घिमिरेले बताए ।