वीरगंज । बारामा नेपाली काँग्रेसका जिल्ला सचिव भैयाराम यादवलाई जिल्ला प्रहरी कार्यालयभित्रै कुटपिट गरेर घाइते बनाउने कार्यमा संलग्न रहेका प्रहरी अधिकृतहरुलाई निलम्बनको माग गर्दै कांग्रेस र नेकपा एकिकृत समाजवादीका नेता कार्यकर्ताहरुले कलैयामा प्रदर्शन गरेका छन् । कांग्रेस जिल्ला सचिव यादवलाई प्रहरी कार्यालय भित्र कुटपिट गरेर घाइते बनाएका बाराका प्रहरी नायब उपरीक्षक पुरुषोत्तम पाण्डे र प्रहरी निरीक्षक रुपेश साहलाई निलम्बनको माग गर्दै उनिहरूले विरोध प्रदर्शन गरेका हुन । बिहीबार दिउँसो कांग्रेस पार्टी कार्यालयबाट काँग्रेस बाराका सचिव राजेश रौनियार र महागढीमाई नगरपालिका मेयर उपेन्द्र यादवको नेतृत्वमा निस्केको विरोध ¥यालीले पाण्डे र र साहलाई निलम्बनको माग गर्दै कलैया नगरको परिक्रमा गरी जिल्ला प्रशासन कार्यालय र जिल्ला प्रहरी कार्यालय अगाडि पुगेर नाराबाजीसमेत गरेको थियो ।

सवारी दुर्घटनामा घाइते भएकालाई उपचार खर्च दिलाउनको लागि जिल्ला प्रहरी कार्यालय बारामा गतत मंगलबार भएको छलफलमा काँग्रेस बाराका सचिव यादवलाई प्रहरी नायब उपरीक्षक पाण्डेको निर्देशनामा प्रहरी निरीक्षक साह लगायतका प्रहरीहरूले कुटपिट गरेर घाइते बनाएको कांग्रेसको आरोप छ । घाइते यादवको वीरगन्जको अस्पतालमा उपचार गरिएको छ । सवारी दुर्घटनामा घाइते भएका गाउँका स्थानीय सुनिल यादवलाई गाडी धनी कन्हैया गुप्ताबाट उपचार खर्च दिलाउनको लागि जिल्ला प्रहरी कार्यालयमा प्रहरी निरीक्षक साहको रोहबरमा गाडी धनी, घाइते बिच छलफल चलिरहेकै अवस्थामा प्रहरी निरीक्षक रुपेश साहले सबै नेताहरू दलाल रहेको भन्दै नेताहरूको काम नरहेको भन्दै गाली गलौज गर्न थाले पछि त्यसको प्रतिवाद गर्दा सचिव यादव लगायत छलफलमा सहभागीहरूलाई कुटेर लखेट्न प्रहरी नायब उपरीक्षक पाण्डेले निर्देशन गरे पछि प्रहरी निरीक्षक साह लगायतकाले छलफलमा सहभागीहरूलाई कुटपिट गरेका थिए।

सचिव यादवलाई कुटपिट गर्ने प्रहरी नायब उपरीक्षक पाण्डे र प्रहरी निरीक्षक साहलाई निलम्बन गरेर कारबाही नगरे सम्म काँग्रेस बाराले आन्दोलन जारी नै राख्ने कांग्रेसका जिल्ला सचिव रौनियारले बताए । बाराका प्रहरी उपरीक्षक होबिन्द्र बोगटीले प्रहरी कार्यालय भित्र काँग्रेस सचिव भैयाराम यादवलाई प्रहरीले कुटेर घाइते बनाएको घटनाको बारेमा आन्तरिक छानबिन समेत सुरु गरिएको बताएका छन्। छानबिनमा प्रहरीको कुटाइबाट काँग्रेस सचिव यादव घाइते भएको भेटिएमा दोषी प्रहरीहरूलाई कारबाही गरिने बोगटीले बताए । गत असार १२ गते कलैया वीरगन्ज हुलाकी सडक खण्डको बघवनमा रोकिएर राखिएको कन्हैया गुप्ताले चलाएको पिक अप भ्यानमा मोटरसाइकल ठोकिँदा सुनिल यादव घाइते भएका थिए । घाइते भएका यादवको बहुअरी अस्थित रहेको नए एस न्युरो हस्पिटलमा उपचार गराउँदा पाँच लाखको अस्पतालले उपचार खर्च बताए पछि अस्पतालको बिल तिर्नमा दुवै पक्ष बिच विवाद सृजना भएको बारा प्रहरीले बताएको छ ।