जनकपुरधाम  । साउदी अरबमा ड्रोन आक्रमणमा परी ज्यान गुमाएका महोत्तरीको पिपरा गाउँपालिका–२ ढेकाहाका ४५ वर्षीय भरत महतोको शनिबार अन्तिम संस्कार गरिएको छ । परिवारजन, आफन्त तथा स्थानीयवासीको उपस्थितिमा गरिएको अन्तिम संस्कारमा उनका १२ वर्षीय छोरा राजन महतोले पार्थिव शरीरमा दागबत्ती दिएका थिए ।

१४ वर्षदेखि वैदेशिक रोजगारीमा रहेका भरतको पार्थिव शरीर शुक्रबार काठमाडौं ल्याइएको थियो । त्यसपछि गृहजिल्ला महोत्तरी पु¥याइएको उनको शवको शनिबार अन्तिम संस्कार गरिएको हो । गत कात्तिक ४ गते यमनका हुथी विद्रोहीले साउदी अरबको पूर्वी प्रान्तस्थित सैबाह तेल क्षेत्रमा रहेको साउदी अरामकोको परियोजनालाई लक्षित गरी ड्रोन आक्रमण गरेका थिए ।

उक्त आक्रमणमा परी भरतको मृत्यु भएको थियो । उनी अब्दुल अहाब मन्सुर अल मौलेम सोन्स कम्पनीमार्फत उक्त परियोजनामा सरसफाइको काम गर्दै आएका थिए । लामो समयदेखि वैदेशिक रोजगारीमा रहेका भरतको मृत्युले परिवार शोकमा परेको छ । यसैबीच, रियादस्थित नेपाली दूतावासको पहलमा भरत कार्यरत कम्पनीले उनको परिवारलाई क्षतिपूर्तिबापत कुल १ लाख ८१ हजार साउदी रियाल उपलब्ध गराउने सहमति भएको जनाइएको छ ।