वीरगंज | जापानको सबैभन्दा अग्लो हिमाल माउन्ट फुजीमा एक बाबुले आफ्ना ७ वर्षिय छोरालाई हाइकिङका क्रममा बिच बाटोमा एक्लै छाडेर हिंडेपछि जापान प्रहरीनै चकित परेको छ।

हाइकिङ जारी राख्न एक बुबाले आफ्ना ७ वर्षीय छोरालाई घण्टौँसम्म एक्लै छाडेपछि प्रहरीले उनलाई पक्राउ गरेर छोरो भएको ठाउँमा ल्याएर उनलाई चेतावनी दिएको थियो। ४८ वर्षीय ती बुबाले थकाइ लागेको गुनासो गरेका छोरालाई ‘यहीँ बस’ भन्दै एउटा सफ्ट ड्रिंक र खाजा मात्र दिएर जेठो छोरासँगै हिमाल चढ्न अगाडि बढेका थिए।

कुहिरो र वर्षा भइरहेको अवस्थामा २ हजार मिटरभन्दा बढी उचाइमा रहेको स्थानमा ती बालकलाई बेन्चमा एक्लै बसिरहेको अवस्थामा भेटिएको थियो। शिखरतर्फ जाने पदमार्गको छैटौँ स्टेशननजिकै रहेको एक पर्वतीय विश्रामस्थलका कर्मचारीले बालकलाई एक्लै देखेपछि प्रहरीलाई खबर गरेका थिए।

प्रहरीले उनको बुबालाई सातौँ र आठौँ स्टेशनको बीचमा फेला पारेको थियो, जुन स्थान बालक बसेको ठाउँबाट करिब तीन घण्टाको पैदल दूरीमा रहेको बताइएको छ। बालक बिहीबार बिहान स्थानीय समयअनुसार ७:३० बजे एक्लै भेटिएका थिए। करिब आठ घण्टासम्म कुर्नुपरेपछि उनी निकै थकित र चिन्तित देखिएका थिए।

बुबा माथिल्लो स्टेशनबाट फर्किएर छोरासँग पुनर्मिलन भएपछि प्रहरीले उनलाई चेतावनी दिएको थियो। ‘सँगै हिमाल चढ्ने योजना त्याग्नै परे पनि बच्चालाई एक्लै छाड्नु स्वीकार्य हुँदैन।’ प्रहरी अधिकारीले भनेका छन्।

ती बुबाले भने आफ्नो निर्णय ‘हठात् र गलत’ भएको स्वीकार गर्दै माफी मागेका छन्। परिवार माउन्ट फुजीको फुजिनोमिया मार्गबाट आरोहण गरिरहेको बताइएको छ। यो मार्ग हिमालको पाँचौँ स्टेशनबाट सुरु हुन्छ, जहाँ सार्वजनिक यातायातबाट पनि पुग्न सकिन्छ।

आरोहणसम्बन्धी मार्गदर्शिकाअनुसार पाँचौँ स्टेशनबाट माउन्ट फुजीको शिखर पुग्न करिब पाँच घण्टा र तल झर्न थप तीन घण्टा लाग्ने गर्छ। ३ हजार ७७६ मिटर अग्लो माउन्ट फुजीमा पछिल्ला वर्षहरूमा आरोहणका क्रममा विभिन्न दुर्घटना र उद्धारका घटना हुँदै आएका छन्।

गत जुलाईमा ९९ वर्षीया एक महिलालाई आरोहणका क्रममा लडेर हिप र ढाडमा चोट लागेपछि उद्धार गरिएको थियो। यस्तै, गत वर्ष आधिकारिक आरोहण सिजनबाहिर हिमाल चढेका २७ वर्षीय एक विश्वविद्यालय विद्यार्थीलाई चार दिनभित्र दुई पटक उद्धार गर्नुपरेको थियो। उनी हराएको मोबाइल फोन खोज्न फेरि हिमालतर्फ फर्किएका थिए।

टोकियोको दक्षिण–पश्चिममा रहेको सक्रिय ज्वालामुखी माउन्ट फुजीलाई सन् २०१३ मा विश्व सम्पदा सूचीमा सूचीकृत गरिएको थियो यो माउन्ट टाते र माउन्ट हाकुसँगै जापानका तीन परम्परागत ‘पवित्र हिमाल’मध्ये एक हो।

हरेक वर्ष करिब दुई लाख मानिस माउन्ट फुजी आरोहण गर्छन्। अत्यधिक भीड नियन्त्रण गर्न केही मार्गमा दैनिक आरोहीको सङ्ख्यासमेत सीमित गरिएको छ।