वीरगंज | पूर्वी भारतीय राज्य झारखण्डको राजधानी राँचीमा विधानसभातर्फ मार्च गरिरहेका विद्यार्थीहरूको भीडलाई तितरबितर पार्न प्रहरीले सोमबार अश्रुग्यास, लाठीचार्ज र पानीको फोहोरा प्रयोग गरेको छ ।

सरकारी भर्ना परीक्षामा धाँधली भएको आरोप लगाउँदै आएका आन्दोलित विद्यार्थी र सरकारबीच आइतबार भएको छैटौँ चरणको वार्ता कुनै निष्कर्षमा पुग्न सकेको थिएन ।

झारखण्डमा यसै वर्ष जुलाई २५ देखि विद्यार्थीले धर्ना र आन्दोलन सुरु गरेका हुन् । विद्यार्थी नेता देवेन्द्रनाथ महतो अगस्ट २ देखि अनिश्चितकालीन भोक हडतालमा छन् । उनले सरकारी सेवाका निम्ति लिइएको विभिन्न परीक्षामा भएको भनिएको अनियमिततामाथि कारबाहीको माग गर्दै आएका छन् ।

यसैबीच, भर्ना परीक्षामा भएको भनिएको धाँधलीसम्बन्धी अनुसन्धानका क्रममा सरकारी अधिकारीले सोमबार झारखण्ड लोकसेवा आयोगका पूर्वअध्यक्ष एल ख्याङ्तेलाई नियन्त्रणमा लिएका छन् ।

मुख्यमन्त्री हेमन्त सोरेनले आन्दोलित विद्यार्थीलाई परीक्षामा भएको भनिएका अनियमितताबारे आफ्नो सरकारले कारबाही गर्ने आश्वासन दिँदै वार्ताका निम्ति आह्वान गरेका थिए ।