वीरगञ्ज । आचार्य एकेडेमी, वीरगञ्ज–३ मा विद्यार्थीहरूको आयोजनामा गुरु पूर्णिमाको अवसरमा विशेष सम्मान तथा सांस्कृतिक कार्यक्रम भव्य रूपमा सम्पन्न भएको छ।
विद्यालयका प्रधानाध्यापक मो. सगीर अलीको अध्यक्षतामा सम्पन्न कार्यक्रममा विद्यार्थीहरूले गुरुहरूलाई टीका, माला तथा सम्मानपत्र प्रदान गर्दै सम्मान व्यक्त गरेका थिए। कार्यक्रममा स्वागत मन्तव्य, कविता वाचन, प्रेरणादायी भनाइ, गीत, नृत्य तथा विविध सांस्कृतिक प्रस्तुतिहरूले उपस्थित सबैको मन जितेका थिए।
समापन मन्तव्यका क्रममा प्रधानाध्यापक मो. सगीर अलीले गुरु पूर्णिमा केवल एउटा पर्व मात्र नभई ज्ञान, अनुशासन, संस्कार र सम्मानको भावनालाई आत्मसात गर्ने महत्वपूर्ण अवसर भएको बताउनुभयो। उहाँले शिक्षक र विद्यार्थीबीचको सम्बन्ध विश्वास, सम्मान र निरन्तर सिकाइमा आधारित हुनुपर्ने उल्लेख गर्दै यस्ता कार्यक्रमले विद्यार्थीहरूको सिर्जनशीलता, नेतृत्व क्षमता र गुरुहरूप्रतिको सम्मानलाई अझ प्रगाढ बनाउने विश्वास व्यक्त गर्नुभयो।
उहाँले कार्यक्रम सफल बनाउन सक्रिय भूमिका निर्वाह गर्ने सम्पूर्ण विद्यार्थी, शिक्षक–शिक्षिका तथा सहयोगी सबैप्रति हार्दिक धन्यवाद ज्ञापन गर्दै यस्ता रचनात्मक कार्यक्रमहरूले विद्यालयको शैक्षिक, सांस्कृतिक तथा नैतिक वातावरणलाई थप सुदृढ बनाउने धारणा व्यक्त गर्नुभयो।
कार्यक्रममा विद्यालयका शिक्षक–शिक्षिका, विद्यार्थी तथा अन्य अतिथिहरूको उत्साहजनक सहभागिता रहेको थियो। विद्यार्थीहरूले प्रस्तुत गरेका विविध सांस्कृतिक कार्यक्रम तथा सम्मान समारोहले गुरु पूर्णिमाको महत्वलाई जीवन्त रूपमा प्रस्तुत गरेका थिए।
कार्यक्रम सहभागी सबैप्रति आभार व्यक्त गर्दै आगामी दिनमा पनि यस्ता सिर्जनात्मक, मूल्यपरक तथा प्रेरणादायी कार्यक्रमलाई निरन्तरता दिने प्रतिबद्धतासहित सम्पन्न भएको विद्यालयले जनाएको छ।
