हरिद्वार । श्री करौली शंकर महादेव धाम, मिश्री मठका सर्वोच्च प्रमुख करौली शंकर महादेव महाराजको पट्टाभिषेक समारोह श्री पञ्चायती अखाडा नयाँ उदासीन निर्वाणमा सन्त–महन्त तथा विशिष्ट महानुभावहरूको उपस्थितिमा भव्य रूपमा सम्पन्न भएको छ। समारोहमार्फत उहाँलाई नयाँ उदासीन निर्वाण अखाडाको महामण्डलेश्वर पदमा अभिषेक गरिएको हो।

पट्टाभिषेक विधि मुखिया महन्त भगतराम जी महाराज, मुखिया महन्त आकाश मुनि जी, मुखिया महन्त मंगलदास जी, अध्यक्ष महन्त धुनीदास जी महाराज तथा अन्य पदाधिकारीहरूको उपस्थितिमा वैदिक परम्पराअनुसार सम्पन्न गरिएको थियो। तिलक–चादर तथा अभिषेक विधि मुखिया महन्त जगतार मुनि जी र अध्यक्ष महन्त गोपालदास जी महाराजले सम्पन्न गराएका थिए।

समारोहलाई सम्बोधन गर्दै प्रमुख महन्त भगतराम जी महाराजले करौली शंकर महादेव योग, मन्त्र दीक्षा, ध्यान तथा भारतीय संस्कृतिका संवाहक भएको बताउँदै सन्तहरूको जीवन मानवसेवा र परोपकारमा समर्पित रहने उल्लेख गर्नुभयो। उहाँले करौली शंकर महादेवले देश तथा विश्वभर मानव जातिलाई दुःखबाट मुक्त गराउने आध्यात्मिक अभियान सञ्चालन गरिरहेको बताउनुभयो।

श्री पञ्चायती अखाडा नयाँ उदासीन निर्वाणका सचिव प्रमुख महन्त जगतार मुनि जीले करौली शंकर महादेवलाई महामण्डलेश्वर पदमा नियुक्त गरिएको जानकारी दिँदै अखाडाको परम्परा, प्रतिष्ठा र गौरवलाई अझ उचाइमा पु¥याउने विश्वास व्यक्त गर्नुभयो।

अखिल भारतीय अखाडा परिषद्का राष्ट्रिय अध्यक्ष तथा महानिर्वाणी अखाडाका सचिव महन्त रविन्द्र पुरी जी महाराजले शुभकामना व्यक्त गर्दै करौली शंकर महादेव मानवताको सेवामा समर्पित विशिष्ट सन्त भएको बताउनुभयो। उहाँका गुरु पण्डित श्री राधा रमण जी मिश्रलाई सनातन परम्पराका दुर्लभ साधकमध्ये एक मान्दै तन्त्र तथा आध्यात्मिक साधनालाई नयाँ दिशा दिएको उल्लेख गरियो।

कार्यक्रममा विभिन्न अखाडा, सन्त समाज, धार्मिक अगुवा, जनप्रतिनिधि तथा भक्तजनहरूको उल्लेखनीय सहभागिता रहेको थियो। क्याबिनेट मन्त्री प्रदीप बत्राले समारोहमा देखिएको विशाल उपस्थितिले करौली शंकर महादेवप्रति जनआस्था प्रष्ट भएको बताउँदै आगामी कुम्भ मेलालाई भव्य रूपमा सम्पन्न गर्न प्रदेश सरकार प्रतिबद्ध रहेको जानकारी दिनुभयो।

आफ्नो मन्तव्यमा करौली शंकर महादेव महाराजले गुरु परम्पराको मार्गदर्शनअनुसार सनातन संस्कृति र आध्यात्मिक परम्पराको संरक्षण तथा विस्तारमा निरन्तर लागिरहने प्रतिबद्धता व्यक्त गर्नुभयो। अखाडाले दिएको जिम्मेवारी पूर्ण निष्ठाका साथ निर्वाह गर्ने उहाँको भनाइ थियो।

महामण्डलेश्वर स्वामी हरिचेतानन्द जी महाराजले सञ्चालन गरेको उक्त समारोहमा विभिन्न अखाडाका महन्त, साधुसन्त, प्रशासनिक अधिकारी, जनप्रतिनिधि तथा देशभरबाट आएका भक्तजनहरूको उल्लेखनीय उपस्थिति रहेको थियो।