काठमाडौँ | नेपाल पत्रकार महासंघले नेपालखबर डटकम र बिजमान्डु डटकममा प्रकाशित समाचारसम्बन्धी जिल्ला अदालत काठमाडौँको अल्पकालीन अन्तरिम आदेशप्रति गम्भीर ध्यानाकर्षण भएको जनाएको छ।
नेपाल धितोपत्र बोर्डका अध्यक्ष सन्तोष नारायण श्रेष्ठको रिट निवेदनमाथि सुनुवाइ गर्दै जिल्ला अदालत काठमाडौँका न्यायाधीश पीताम्बर शर्माको एकल इजलासले मंगलबार “अप्रमाणित, तथ्यहीन समाचार प्रकाशन नगर्नु, प्रकाशित समाचारहरू अनलाइनबाट तुरुन्त हटाउनू” भन्ने अन्तरिम आदेश दिएको विषयमा महासंघले आपत्ति जनाएको हो।
महासंघको भनाइमा सञ्चारमाध्यममा प्रकाशित/प्रसारित सामग्रीप्रति असहमति भएमा त्यसबारे प्रेस काउन्सिल नेपालमार्फत उजुरी दर्ता गरी आवश्यक प्रक्रिया अघि बढाउन सकिने स्पष्ट संवैधानिक र कानुनी व्यवस्था छ। अदालतको यो आदेश प्रेस स्वतन्त्रता, नेपालको संविधान २०७२ को मर्म तथा अन्तर्राष्ट्रिय प्रेस स्वतन्त्रताको मान्यताको विपरीत रहेको महासंघको ठहर छ।
महासंघले भन्यो, “संविधानले प्रस्तावनामै पूर्ण प्रेस स्वतन्त्रताको प्रत्याभूति गरेको छ, जुन कुनै पनि निकायको आदेशबाट सीमित गर्न मिल्दैन।”
यद्यपि, महासंघले न्यायालयको निर्णयप्रति सम्मान व्यक्त गर्दै त्यसको पालना लोकतन्त्रको अभिन्न अङ्ग भएको मान्यता पनि दोहोर्याएको छ। तर यस आदेशप्रति पुनर्विचार गर्न अदालतलाई आग्रह गर्दै, आवश्यकता परे कानुनी र अन्य प्रक्रिया अपनाउने चेतावनी समेत दिएको छ।
महासंघले सञ्चारमाध्यमहरूलाई पनि पत्रकार आचारसंहिताको पूर्ण पालना गर्दै प्रकाशित सामग्रीका तथ्यहरूको पुष्टि गर्न आग्रह गरेको छ। सञ्चारमाध्यमद्वारा प्रकाशित सामग्रीको सम्पूर्ण जिम्मेवारी स्वयं सञ्चारमाध्यमको नै हुने स्पष्ट पारिएको छ।
