बिराटनगर, ११ जून २०२५ — बिराटनगर महानगरपालिका–१४ मा अवस्थित जतुवा खानेपानी तथा सरसफाइ आयोजनालाई आज एक औपचारिक समारोहबीच नेपाल खानेपानी संस्थान, शाखा बिराटनगरको स्वामित्वमा हस्तान्तरण गरिएको छ। आयोजनाको हस्तान्तरणसँगै नियमित सेवा पनि औपचारिक रूपमा शुभारम्भ भएको छ।
१८ वर्ष अघिदेखि निर्माणाधीन अवस्थामा रहेको यो आयोजना अब संस्थागत सेवा सञ्चालनको चरणमा प्रवेश गरेको हो। आयोजनाको सञ्चालनपछि दैनिक १७ लाख लिटर पानी उत्पादन गरी वितरण गरिनेछ, जसबाट करिब ६,००० नागरिकहरू प्रत्यक्ष रूपमा लाभान्वित हुने अपेक्षा गरिएको छ।
समारोहमा सम्बोधन गर्दै मन्त्रालयका प्रतिनिधिले भने, “सरकार जनताको आधारभूत सेवामा पहुँच सुनिश्चित गर्न पूर्ण रूपमा प्रतिबद्ध छ। मन्त्रालयको तर्फबाट यो आयोजनाको सफल कार्यान्वयनमा आवश्यक नीति, स्रोत र सहकार्य उपलब्ध गराउन हामी सधैं तत्पर छौं।”
खानेपानी तथा सरसफाइ सेवाको प्रभावकारी व्यवस्थापनले नगरवासीको जीवनस्तरमा सकारात्मक सुधार ल्याउने विश्वास गरिएको छ। स्थानीय तह, नेपाल सरकार, विकास साझेदार र समुदायबीचको सहकार्यमार्फत यस्ता आयोजनाले दिगो विकासका लक्ष्य (SDG) मा पुग्न समेत टेवा पुर्याउने अपेक्षा गरिएको छ।
