वीरगंज । श्रुति साह । २०८२ साल जेठ २७ गते, सशस्त्र प्रहरी बल, नेपाल प्रादेशिक सुरक्षा गुल्म वीरगञ्ज र वीरगञ्ज भन्सार कार्यालयबाट खटिएको संयुक्त टोलीले विशेष सूचनाको आधारमा वीरगञ्ज महानगरपालिका–१०, बजरंगटोलस्थित “सुधा कुञ्ज” लेखिएको तीनतले घरको ग्राउन्ड फ्लोरमा भारतबाट अबैध रूपमा भन्सार छली ल्याई गोदाममा राखिएको सामान बरामद गरेको छ। धिरज रौनियारले भाडामा लिएको उक्त स्थानबाट रु. ७,७०,५०० बराबरको विभिन्न कपडाहरू र BR05U4530 नम्बरको Super Splendor मोटरसाइकल फेला पारिएको छ। उक्त मोटरसाइकलको मूल्य रु. १,५०,००० तोकिएको छ। बरामद सामान र सवारीसाधनलाई नियन्त्रणमा लिई आवश्यक कानुनी कारवाहीको लागि वीरगञ्ज भन्सार कार्यालयमा बुझाइएको छ।

उक्त दिनै, सोही गुल्मबाट वीरगञ्ज महानगरपालिका–१० र १६ का विभिन्न सीमा नाकाबाट रु. २,४८,१०० बराबरको कपडा र मसला समेत बरामद गरी भन्सार कार्यालयमा बुझाइएको सशस्त्र प्रहरीले जनाएको छ।

यस्तै, सशस्त्र प्रहरी गुल्म अलौबाट खटिएको टोलीले बिन्दवासिनी गाउँपालिका–५, प्रसौनीबाट भारततर्फबाट भन्सार छलि ल्याउँदै गरेको BR 22 T1432 नम्बरको मोटरसाइकलमा राखिएको रु. २३,३८० बराबरको किराना सामान समेत नियन्त्रणमा लिएको छ। मोटरसाइकलको मूल्य रु. १,८०,००० तोकिएको छ र सो पनि वीरगञ्ज भन्सार कार्यालयमा बुझाइएको छ।

सशस्त्र प्रहरी नायब उपरीक्षक देवेन्द्र बहादुर सिंहले सबै बरामद सामग्रीहरू सम्बन्धित निकायमा बुझाई आवश्यक कारबाही प्रक्रिया अगाडि बढाइएको जानकारी दिनुभएको छ।