पर्सा | पर्सा जिल्लाको सखुवा प्रसौनी गाउँपालिका–१ जमुनियास्थित जमुनिया खोलाबाट अवैध रूपमा गिट्टी र बालुवा उत्खनन् गरी लैजाँदै गरेका दुई वटा ट्याक्टरलाई प्रहरीले नियन्त्रणमा लिएको छ।
सोमबार बिहान जमुनिया खोलाबाट गिट्टी र बालुवा अवैध रूपमा उत्खनन् गरी लोड गरिएको अवस्थामा प्र.२–०३–००१त.१५७ नम्बरको गिट्टी लोड ट्याक्टर र प्रदेश २–०३–००१ च १२९२ नम्बरको बालुवा लोड ट्याक्टरलाई ईलाका प्रहरी कार्यालय पटेर्वा सुगौलीको टोलीले नियन्त्रणमा लिएको हो।
प्रहरीले जानकारी दिएअनुसार, दुवै ट्याक्टरलाई गिट्टी–बालुवासहित ईलाका प्रहरी कार्यालयको परिसरमा राखिएको छ र आवश्यक कानुनी कारबाही प्रक्रिया अगाडि बढाइएको छ।
जिल्ला प्रहरी कार्यालय पर्साका अनुसार खोलाबाट अवैध रुपमा प्राकृतिक स्रोत उत्खनन् गर्नेहरूमाथि निगरानी बढाइएको छ र यस्ता कार्यमा संलग्नलाई कानुन बमोजिम कडा कारबाही गरिनेछ।
