काठमाडौं | वीरगंज महानगरपालिकाको दीर्घकालीन खानेपानी तथा ढल व्यवस्थापन सुधारका लागि खानेपानी मन्त्रालयमा आज एक महत्वपूर्ण छलफल कार्यक्रम सम्पन्न भएको छ।
छलफल कार्यक्रममा एसियाली विकास बैंक (ADB) को ऋण सहयोगमा वीरगंजमा सञ्चालन गरिने खानेपानी आयोजनाहरू सम्बन्धी विषयमा गहन विचार-विमर्श भएको हो। कार्यक्रममा सरोकारवाला निकायका उच्च प्रतिनिधिहरू, प्राविधिक विज्ञहरू तथा मन्त्रालयका अधिकारीहरूको उपस्थिति थियो।
छलफलमा प्राप्त सहमतिअनुसार, आगामी साउन महिनाभित्रै आयोजनाको टेण्डर आह्वान गर्न एडिबीसँग थप प्राविधिक र वित्तीय छलफल अगाडि बढाइने भएको छ। कुल १२ वटा आयोजना प्रस्तावितमध्ये पहिलो चरणमा कम्तिमा ६ वटा आयोजना तुरुन्त सुरु गर्ने निर्णय भएको मन्त्रालय स्रोतले जनाएको छ।
“यो छलफल वीरगंजको दीर्घकालीन खानेपानी समस्या समाधानतर्फ एक ठोस कदम हो,” कार्यक्रममा सहभागी एक अधिकारीले बताए।
कार्यक्रममा सरोकारवाला सबै निकायबीच आपसी समन्वय र सहकार्यलाई अझ सुदृढ बनाउँदै, आगामी दिनमा वीरगंज महानगरपालिकाका बासिन्दाको जीवनस्तरमा सकारात्मक परिवर्तन ल्याउने विश्वास व्यक्त गरिएको थियो।
खानेपानी मन्त्रालयले यस्ता कार्यक्रमलाई प्राथमिकतामा राख्दै देशका अन्य महानगरहरूमा पनि क्रमशः यस्ता परियोजना विस्तार गर्ने लक्ष्य लिएको जनाएको छ।
