वीरगंज । यातायात कार्यालय विराटनगरमा बिचौलियाको सक्रियता बढ्दै गएपछि प्रहरीले कारबाहीको प्रक्रिया अघि बढाएको छ। बिचौलियाको रूपमा काम गर्दै सर्वसाधारणलाई ठगी गर्ने गरेको गुनासो आएपछि जिल्ला प्रहरी कार्यालय मोरङले विशेष अभियान सञ्चालन गरी १२ जनालाई पक्राउ गरेको छ।

प्रहरीका अनुसार, सोमबार दिउँसो विराटनगर महानगरपालिका–४ खार्जीस्थित यातायात कार्यालय अगाडि बिचौलियाको रूपमा संलग्न रहेको आरोपमा ती व्यक्तिहरूलाई नियन्त्रणमा लिइएको हो। मोरङ प्रहरी निरीक्षक सरोज खनालको नेतृत्वमा खटिएको टोलीले उक्त कारबाही गरेको हो।

पक्राउ पर्नेहरूमा विराटनगर–३ का सञ्जीव कोइराला, राजेश खड्का, गौरव कुमार माझी, राजु कोइराला, दुहबी नगरपालिकाका युवराज लम्साल, विराटनगर–५ का अनिल बस्नेत, विराटनगर–४ का राजीव मण्डल, सुनसरीको बर्जु गाउँपालिकाका प्रवीण कुमार थन्दार, कटहरी गाउँपालिका–१ का भागवत राजवंशी, बुढिगंगा गाउँपालिका–२ का उदय कार्की, बुढिगंगा–१ का सुनिल दाहाल र विराटनगर–३ का अजय कुमार मण्डल रहेका छन्।

प्रहरीले उनीहरूलाई जिल्ला प्रहरी कार्यालय मोरङमा राखी थप अनुसन्धान अघि बढाएको जनाएको छ।

यता, वीरगंज यातायात कार्यालयमा पनि बिचौलियाको बिगबिगी रहेको गुनासो आइरहेको छ। सेवाग्राहीहरू बिचौलियाको प्रभावका कारण सहज रूपमा सेवा पाउन नसकेको भन्दै गुनासो गरिरहेका छन्। यातायात व्यवस्था विभाग र स्थानीय प्रशासनले यसबारे निगरानी बढाउनुपर्ने माग उठ्न थालेको छ।

सार्वजनिक सेवामा बिचौलियाको प्रभाव हटाउन सम्बन्धित निकायले कडाइ नगरेसम्म समस्या जस्ताको तस्तै रहने स्थानीयको भनाइ छ। प्रहरीले विराटनगरमा गरेको कारबाही जस्तै वीरगंजमा पनि निगरानी बढाउनुपर्ने र प्रशासनको ध्यानाकर्षण हून जरुरी छ ।