बारा | सिकिन्द्र साह | बारा जिल्लाको सिम्रौनगढ नगरपालिका–२ मउवही टोलमा दुई महिना अघि जडान गरिएको खानेपानी बोरिङ सञ्चालनमा आउन नपाउँदै बिग्रिएको छ। नगरपालिकाले परमानन्द मुखियाको नेतृत्वमा खानेपानी सुविधा पुर्याउने उद्देश्यले बोरिङ जडान गरेको थियो, तर हालसम्म स्थानीयले निरन्तर रूपमा पानी नपाएको गुनासो गरेका छन्।
परमानन्द मुखियाले बोरिङमा केही मेसिनरी समस्या आएको स्वीकार्दै चाँडै मर्मत गरेर पुनः सञ्चालनमा ल्याइने बताएका छन्। तर, स्थानिय राजु गुप्ताले वडा अध्यक्ष अरबिन्द मुखियासँग सोध्दा, यसअघि सञ्चालनमा रहेको खानेपानी बोरिङ नै जीर्ण अवस्थामा रहेको र त्यसलाई मर्मत गर्न अत्यावश्यक भएको बताए।
वडा अध्यक्षले नगर प्रमुखले आफ्ना नजिकका व्यक्तिहरूलाई योजना बाँडफाँड गरी परियोजना सञ्चालन गरेको आरोप लगाउँदै, समाधानको जिम्मेवारी नगर प्रमुखकै भएको बताए।
यसैबीच, स्थानीय बासिन्दा रामप्रसाद गुप्ता, मुना गुप्ता, उमेश यादवलगायतले बोरिङ बन्द भएपछि टाढाबाट पानी ल्याउनुपर्ने बाध्यता रहेको गुनासो गरेका छन्। उनीहरूका अनुसार समतल भूभागमै यस्तो समस्या छ भने विकट क्षेत्रमा त झन् जीवनयापन कठिन भएको छ। “खायो-पकायो जस्तो योजना आयो, तर जनप्रतिनिधिले समस्या सुनेनन्। अब कहाँ गुहार गर्ने?” स्थानीयको प्रश्न छ।
स्थानीय बासिन्दाले चाँडै समाधानको माग गर्दै नगरपालिकासँग पुनः बोरिङ मर्मत तथा दीर्घकालीन समाधान खोज्न आग्रह गरेका छन्।
