वीरगञ्ज | वीरगञ्जमा स्पा तथा मसाज सेन्टरको नाममा यौन धन्दा फस्टाउँदै गएको पाइएको छ। थप सेवा (happy ending) को नाममा यौन क्रियाकलापहरू भइरहेको स्थानीय तथा ग्राहकहरूको भनाइ छ। एक ग्राहकका अनुसार, राम्रो सोच राखेर सञ्चालन भएका स्पा तथा मसाज सेन्टरमा कन्डमको आवश्यकता किन पर्छ र ढोका किन थुन्नुपर्छ भन्ने प्रश्न उठ्छ। यसले यस्ता स्थानहरूमा अवैध गतिविधि भइरहेकाे सहजै अनुमान गर्न सकिने उनले बताए।
यस्तै, उनले प्रहरीको भूमिका पनि शंकास्पद रहेको बताए। “स्पा तथा मसाज सेन्टरमा भइरहेको यौन धन्दा रोक्न प्रहरी प्रशासनले कुनै चासो दिएको छैन, जसले गर्दा प्रहरीकै मिलोमतोमा यस्तो धन्दा चलिरहेको हो कि भन्ने प्रश्न उठ्छ,” उनले भने। पछिल्लो समय वीरगञ्जका विभिन्न स्थानहरूमा स्पा तथा मसाज सेन्टरहरू तीव्र गतिमा खुलिरहेका छन्।
भारतको रक्सौल सिमानजिक पर्ने वीरगञ्ज नेपालका विभिन्न सहरहरूमा जाने मुख्य नाका भएकाले यस्ता गतिविधि झनै मौलाउँदै गएका छन्। प्रहरी प्रशासनलाई सबै कुरा थाहा हुँदाहुँदै पनि उनीहरू मौन बसेको आरोप छ। वीरगञ्जको लिंक रोड, आदर्शनगर, घण्टाघर क्षेत्र, बस्टपर्क क्षेत्र लगायतका ठाउँहरूमा यस्ता अवैध क्रियाकलापहरू बढ्दै गएका छन्।
