सिमरा | सरकारले बाराको सिमरास्थित विशेष आर्थिक क्षेत्र (सेज) मा थप १५ वटा उद्योगलाई स्थापना अनुमति र जग्गा (प्लट) प्रदान गरेको छ। उद्योग वाणिज्य तथा आपूर्ति मन्त्रालयले सोमबार सार्वजनिक गरेको सय दिने कार्यप्रगति विवरणमा यो जानकारी दिइएको हो। मन्त्रालयका अनुसार, सिमरा सेजमा थपिएका यी १५ उद्योगले ६८४ करोड रुपैयाँ लगानी गर्न र १२८७ जनाका लागि रोजगारी सिर्जना गर्ने प्रतिबद्धता व्यक्त गरेका छन्।

यी उद्योगहरूमध्ये सातवटा उद्योगसँग उद्योग सञ्चालनका लागि आवश्यक सम्झौता सम्पन्न भइसकेको पनि मन्त्रालयले जानकारी दिएको छ। सिमरा सेजमा यस किसिमको आर्थिक गतिविधिले उद्योगी तथा व्यवसायीहरूको आकर्षण बढाएको छ, जसले प्रदेश र राष्ट्रियस्तरमा रोजगारीको अवसर विस्तार गर्नुका साथै औद्योगिक विकासलाई थप बल पुर्‍याउने अपेक्षा गरिएको छ।

सिमरा सेजको विकासले व्यापारिक तथा औद्योगिक क्षेत्रमा महत्त्वपूर्ण योगदान गर्ने अनुमान छ। यो क्षेत्रमा सरकारद्वारा जग्गा प्राप्त गरेका उद्योगहरूले देशको आर्थिक वृद्धिमा योगदान पुर्‍याउने र स्वदेशी उत्पादनलाई बढावा दिनेछ। साथै, यसले विदेशी लगानी र अन्तर्राष्ट्रिय व्यापारलाई समेत प्रोत्साहन गर्ने आशा गरिएको छ।

यसैगरी, भैरहवा विशेष आर्थिक क्षेत्र (सेज) मा पनि १० वटा उद्योगलाई स्थापना गर्नका लागि प्लट (जग्गा) प्रदान गरिएको छ। ती उद्योगहरूले ३४४ करोड रुपैयाँको लगानी गर्ने र ३५२३ जनालाई रोजगारी दिने प्रतिवद्धता जनाएका छन्। भैरहवा सेजमा प्लट प्राप्त गरेका उद्योगहरूमध्ये दुईवटाले उत्पादन सुरु गरिसकेका छन् भने तीनवटा उद्योगसँग सञ्चालनका लागि सम्झौता सम्पन्न भइसकेको मन्त्रालयले जनाएको छ।

वर्तमान सरकारले गठन भएको सय दिनको अवधिमा सिमरा र भैरहवा दुवै सेजमा थप उद्योगहरूको स्थापना र सञ्चालन प्रक्रियामा तीव्रता आएको छ। सेजहरूमा सरकारले गरेको यो प्रगति आगामी दिनमा औद्योगिक उत्पादनमा ठूलो बढोत्तरी र रोजगारी सिर्जनामा महत्त्वपूर्ण योगदान दिने अपेक्षा गरिएको छ।

विशेष आर्थिक क्षेत्रहरूको विकासले नेपालको आर्थिक क्षेत्रलाई गति प्रदान गर्नुका साथै स्वदेशी तथा विदेशी लगानीकर्तालाई आकर्षित गर्ने नीति सफल हुन सक्ने देखिएको छ। औद्योगिक पूर्वाधारको सुदृढीकरण र रोजगारीका अवसरहरूको सिर्जना सरकारको प्राथमिकतामा रहेको भन्दै मन्त्रालयले आगामी दिनमा यस्ता थप प्रयासहरूलाई निरन्तरता दिने योजना बनाएको छ।