वीरगञ्ज । अब सवारीचालकहरूले ट्राफिक नियम उल्लङ्घन गर्दा झन्झटिलो प्रक्रिया बेहोर्नु पर्ने छैन। नेपाल ट्राफिक प्रहरीले लाइसन्स जफत नगरी डिजिटल चिट जारी गर्ने नयाँ व्यवस्था लागू गरेको छ, जसअनुसार अब जरिबाना पनि विद्युतीय माध्यमबाट भुक्तानी गर्न सकिनेछ।

नागरिक एपमा ट्राफिक नियम उल्लङ्घन अभिलेख प्रणाली थपिएको छ। अब ट्राफिक प्रहरीले चालकको अनुमतिपत्र क्यूआर कोड स्क्यान गरी हेर्ने र कारबाही प्रक्रिया अद्यावधिक गर्ने प्रविधि सुरु भएको हो। यसले सवारीचालकहरूलाई अब कागजी चिटको झन्झटबाट मुक्ति दिनेछ। एपमार्फतै जरिबानाको सूचना पाउन सकिने र डिजिटल वालेटमार्फत भुक्तानी गर्न सकिने व्यवस्था पनि भएको छ।

कागजपत्रको झन्झट अन्त्य ट्राफिक प्रहरीले पुरानो कागजी चिट काट्ने पद्धति हटाई डिजिटल चिट जारी गर्ने प्रक्रिया सुरु गरेको छ। यसरी काटिएको चिटको जरिबाना नागरिक एपमार्फत भुक्तानी गर्न सकिनेछ। जरिबाना नतिरेमा अब लाइसन्स नवीकरण रोक्का गर्ने नियम लागू भएको छ। एपमार्फत निरन्तर सूचना आउने र जरिबाना चुक्ता नगरेसम्म लाइसन्स नवीकरण नगर्ने प्रक्रिया सुरु भएको हो।

अनलाइन ट्राफिक सचेतना कक्षा ट्राफिक नियम उल्लङ्घन गरेपछि अनिवार्य रूपमा लिइने ट्राफिक सचेतना कक्षा अब अनलाइनबाटै लिन सकिने व्यवस्था पनि छिट्टै लागू हुने भएको छ। अब सवारीचालकहरूले ट्राफिक प्रहरी कार्यालय धाउनु पर्ने बाध्यता हट्नेछ।

डिजिटल लाइसन्सको प्रविधि लाइसन्स छपाइमा ढिलाइ हुँदा सवारीचालकहरूले अब नागरिक एपमा डिजिटल अभिलेख हेर्न सक्नेछन्। चेकजाँचका लागि अब छापिएको लाइसन्सको सट्टा नागरिक एपकै क्यूआर कोड पर्याप्त हुनेछ। यातायात मन्त्रालयले चिपजडित लाइसन्सको आवश्यकता हटाई डिजिटल लाइसन्सलाई मान्यता दिने सम्बन्धमा नियमावलीमा संशोधनको तयारी पनि गरिरहेको छ।

नयाँ डिजिटल प्रणालीले ट्राफिक कारबाहीलाई थप सरल, छरितो र पारदर्शी बनाउने विश्वास गरिएको छ। क्यूआर कोड स्क्यान गरेर अनुमतिपत्र जाँच गर्नेदेखि जरिबाना काट्नेसम्मको प्रक्रिया सहज भएको यातायात मन्त्रालयले जानकारी दिएको छ।

नयाँ प्रविधिले ट्राफिक कारबाहीलाई सुधार्ने अपेक्षा ट्राफिक प्रणालीमा भएका यस्ता सुधारहरूले नागरिकलाई थप सजिलो बनाउने र यातायात व्यवस्थापनमा सुधार ल्याउने विश्वास गरिएको छ। नयाँ डिजिटल प्रणालीको प्रयोगले सवारीचालक र ट्राफिक प्रहरीबीचको संवादलाई थप प्रविधिमैत्री बनाउने आशा गरिएको छ।