वीरगंज | मधेस प्रदेशमा स्वास्थ्य कार्यालय पर्सा लगातार तीन वर्षदेखि कार्यसम्पादनमा प्रथम भएको छ। मधेस प्रदेश सरकारको स्वास्थ्य तथा जनसंख्या मन्त्रालयले २०७८/७९ देखि हालसम्मको कार्यसम्पादन मूल्यांकनमा स्वास्थ्य कार्यालय पर्सालाई पहिलो स्थानमा राख्दै आएको हो।

आर्थिक वर्ष २०८०/८१ को मूल्यांकनमा पनि पर्साले ८१.८५ अंकसहित प्रथम स्थान हासिल गरेको छ। यसमा स्वास्थ्य कार्यालय सर्लाही ७७.७४ अंकका साथ दोस्रो, र सिरहा ७५.५२ अंकसहित तेस्रो भएको छ।

मधेस प्रदेशका ८ जिल्ला, ११ प्रादेशिक अस्पताल, र एउटा स्वास्थ्य विज्ञान प्रतिष्ठानको कार्यसम्पादन मूल्यांकन गर्दै मन्त्रालयले यो उपलब्धि सार्वजनिक गरेको हो। मूल्यांकनका लागि गठन गरिएको मन्त्रालयस्तरीय समिति मार्फत यी कार्यालयहरूको सेवा प्रवाह, सेवाग्राही सन्तुष्टि, र सूचकहरूको आधारमा मूल्यांकन गरिएको थियो।

जनकपुरमा आयोजित प्रदेश स्तरीय वार्षिक समिक्षा गोष्ठीमा मधेस प्रदेशका मुख्यमन्त्री सतिशकुमार सिंह र स्वास्थ्यमन्त्री सत्रुधन सिंहले स्वास्थ्य कार्यालय पर्साका प्रमुख डा. मुक्ति नारायण साहलाई प्रमाणपत्रसहित सम्मानित गरेका थिए।

जनस्वास्थ्य अधिकृत जयमोद ठाकुरले स्वास्थ्य कार्यालय पर्साले लगातार तीन वर्षदेखि प्रथम स्थान हासिल गर्दै आएको र आगामी वर्ष पनि यो स्थान कायम राख्न प्रतिबद्ध रहेको जानकारी दिएका छन्।

स्वास्थ्य कार्यालय पर्साका जनस्वास्थ्य अधिकृत जयमोद ठाकुरले मधेस प्रदेशमा पर्सा जिल्लाको स्वास्थ्य क्षेत्रमा गरेको उत्कृष्ट कार्यको प्रशंसा गर्दै, यस वर्ष पनि सफलतापूर्वक प्रथम स्थानमा आउनु गर्वको विषय भएको बताए। उनले स्वास्थ्य सेवाको गुणस्तर सुधार्नका लागि कर्मचारीहरूको मेहनत र जनताको सक्रिय सहयोग महत्त्वपूर्ण रहेको उल्लेख गरे।

ठाकुरले आगामी वर्ष पनि पर्सा जिल्लाको स्वास्थ्य सेवा प्रवाहलाई अझ प्रभावकारी बनाउन थप सुधार र नयाँ योजनाहरू कार्यान्वयन गरिने प्रतिबद्धता व्यक्त गरेका छन्। “हामी निरन्तर जनताको सेवा प्रवाहलाई सुधार गर्दै मधेस प्रदेशमै उत्कृष्ट स्वास्थ्य सेवा दिने प्रयासमा छौँ,” ठाकुरले भने।

यसरी लगातार तीन वर्षसम्म पर्सा जिल्ला स्वास्थ्य क्षेत्रमा उत्कृष्ट साबित हुँदा, जनताको स्वास्थ्य सेवामा पहुँच र गुणस्तरमा थप सुधार आउने विश्वास गरिएको छ।