बारा । जिल्ला प्रहरी कार्यालय, बाराले १२ लाख ३३ हजार बराबरको अवैध प्याज र मोबाइलको डिस्प्ले सहित दुई ट्रकलाई नियन्त्रणमा लिएको छ।
इलाका प्रहरी कार्यालय अमलेखगंजले आइतवार जीतपुर सिमरा उपमहानगरपालिका वडा नं. २१, अमलेखगंजमा वीरगञ्जबाट नारायणघाट जाँदै गरेको बा ३ ख ४९८६ नम्बरको यात्रुबाहक बसमा लोड गरिएको सात लाख ३३ हजार ५०० मूल्य बराबरका विभिन्न किसिमका मोबाइलको डिस्प्ले ४८९ पिस नियन्त्रणमा लिएको हो।
यसैगरी, प्रहरी चौकी पथलैयाले आज बिहान जीतपुर सिमरा उपमहानगरपालिका वडा नं. १, पथलैया चोकमा रौतहटबाट कास्की जाँदै गरेको प्र. २-०३-००१ ख ०९५६ नम्बरको ट्रकमा लोड गरिएको एक हजार किलो प्याज (करीब पाँच लाख मूल्य बराबर) नियन्त्रणमा लिएको छ।
बरामद सामान र ट्रक कारबाइको लागि आन्तरिक राजस्व कार्यालय, पथलैया बारामा बुझाइएको जिल्ला प्रहरी कार्यालय, बाराका प्रवक्ता प्रहरी नायब उपरीक्षक दधिराम न्यौपानेले जानकारी गराएका छन्।
