वीरगंज । पकहाँमैनपुर गाउँपालिका वडा नं १ धोरे बस्ने गाउँपालिका अध्यक्ष सुरेश मेहता विरुद्ध सोही ठाउँ बस्ने कमलेश राउत कम्कर सहितका व्यक्तिहरूले ४० वर्ष देखि जग्गा पास नगरेको आरोप लगाउँदै पालिका कार्यालय अगाडि धर्नामा बसेका छन् ।

कमलेश राउत कम्करका अनुसार ४० वर्ष पहिले गाउँपालिका अध्यक्ष सुरेश मेहताको पिता बैजनाथ मेहतालाई १ कठ्ठा १० धुरको तत्कालीन चलन चल्तीको भाउ रु १० हजार तिरी सकेका थिए । तर वैजनाथको मृत्यु भइसकेको र उनका छोरा एवं पकाहाँ मैनपुर गाउँपालिका अध्यक्ष सुरेश मेहताले समेतले पख पख भन्दा भन्दै आज ४० वर्ष विती सक्दा पनि उनले जग्गा पास नगरिदिँदा पीडा खपन नसकी अब बस्ने घर समेत नहुँदा बाध्य भई पालिका कार्यालय अगाडि धर्ना दिन आएको बताए ।

जग्गा नामसारी गरिदिन पटक पटक आग्रह गर्दा पनि गाउँपालिका अध्यक्ष मेहताले सो जग्गा आफुलाई पास नगर्ने मनसाय बनाई अर्कोलाई बेचिएको थाह पाए लगत्तै एक त म रोगले पीडित अर्को जग्गा नपाएर झन् पीडित भएको भन्दै अब मरुन्जेल सम्म पालिका अगाडि धर्ना दिने उनले बताए ।

राजनैतिक पूर्बग्रहले केही व्यक्तिहरू मिली मलाई बदनाम गर्न लागेको र यो विषयमा कुनै सत्यता नभएको गाउँपालिका अध्यक्ष मेहताले बताए । उहाँहरुलाई बस्न अफ्ठयारो भएको खण्डमा केही दिन बस्नको लागि मात्र जग्गा दिएको र अहिले उहाँहरू किनेको नै भन्न थालेको अध्यक्ष महतोले बताए । उहाँहरुले केही दिन बस्नलाई जग्गा दिनु र पछि हामी अन्त्य जग्गा किनेर घर बनाउने र बनाएको घरमा बस्ने र यो जग्गा छोडिदिने भने पछि मैले त्यो जग्गा दिएको उनले भने । तर बस्नलाई दिएको जग्गालाई विभिन्न किसिमको प्रपञ्च रची किनेको भन्न लाग्दा उहाँहरुसँग प्रमाण भएको खण्डमा अहिले नै जग्गा पास गरिदिने उनले भने । राजनीति पूर्वाग्रहले केही व्यक्तिहरू मलाई बदनाम गर्न लागेको अध्यक्ष महतोले भने ।