वीरगंज । जनमत पार्टी पर्साले नेपाल शिक्षक महासङ्घले विद्यालय शिक्षासम्बन्धी विधेयकविरुद्ध सुरु गरेको आन्दोलन प्रति समर्थन र ऐक्यबद्धता जनाएको छ । जनमत पार्टीका पर्सा जिल्ला संयोजक ओमप्रकाश सर्राफ र जिल्ला इन्चार्ज माधव सिंहले मंगलबार संयुक्त विज्ञप्ति जारी गर्दै देशभर जारी शिक्षकहरूको आन्दोलनमा जनमत पार्टीको समर्थन र ऐक्यबद्धता रहेकाे बताएका छन् । सरकारले ल्याएकाे शिक्षा विधेयकले शिक्षालाई निजीकरण र व्यापारीकरण गर्ने जनमत पार्टीको निष्कर्ष छ । त्यस्तै पार्टीले विधेयकलाई प्रतिगामी र शिक्षकहरूको हकहित विपरीत भएकोले पनि बताएको छ ।

‘शिक्षालाई व्यापारीकरण तथा निजीकरण गर्ने उद्देश्यले नेपाल सरकारले ल्याएको शिक्षा विधेयक शिक्षकहरूको हक हित विरोधी रहेको छ । ५२ वर्ष अघि जारी भएको शिक्षा ऐन २०२८ लाई प्रतिस्थापन गर्न सरकारले विद्यालय शिक्षा सम्बन्धी कानुनलाई संशोधन र एकीकरण गर्न बनेको विधेयक भन्दा २०८० मा अहिले ल्याउन लागिएको विधेयक प्रतिगामी छ,’ विज्ञप्तिमा लेखिएको छ । विधेयकले शिक्षकहरूलाई निजामती कर्मचारीहरू सरह सेवा सुविधा दिनुपर्नेमा झन् उनीहरूको अधिकारलाई कटौती गरेको विज्ञप्तिमा भनिएको छ ।

जनमत पार्टीले विधेयकलाई संघीयता विरोध भएको बताउँदै खारेजीको माग पनि गरेको छ । ‘संघीयतालाई कमजोर गर्ने, र प्रदेश सरकारलाई अधिकार बाट वञ्चित गर्ने गरी ल्याइएको विधेयक हामीलाई स्वीकार्य छैन । त्यस कारणले उक्त विधेयक खारेजको जोरदार मागसहित राहत शिक्षकहरूलाई व्यवस्थित र विना सर्त स्थायी गर्न माग गर्दछौँ ।’ सरकारले गत बुधवार संसदमा दर्ता गराएको ‘शिक्षासम्बन्धी कानुन संशोधन र एकीकरण गर्न बनेको विधेयक २०८०’ को विरोधमा देशभरका शिक्षक अहिले आन्दोलित छन् । सरकारले शिक्षक महासङ्घसँग छलफल समेत नगरी एकलौटी दङ्गले विद्यालय शिक्षा विधेयक अघि बढाएको भन्दै उनीहरूले आन्दोलन सुरु गरेका छन् ।