वीरगंज । पर्सा प्रहरीले बिल बिजक भन्दा बढीको औषधि तथा खुद्रा समान लोड भएको एउटा ट्रकलाई नियन्त्रणमा लिएर राजश्व अनुसन्धान कार्यालयमा बुझाएको छ । हाडवयर तथा खुद्रा समानहरू बोकेको मालवाहक ट्रक नियन्त्रणमा लिएर प्रहरीले राजश्व अनुसन्धानको कार्यालयलाई बुझाएको हो ।

बिल विजकभन्दा बढीको सामग्री लोड गरेर वीरगञ्जबाट एउटा ट्रक चितवनतर्फ गइरहेको भन्ने विशेष सूचनाको आधारमा जिल्ला प्रहरी कार्यालय पर्साबाट खटिएको प्रहरी टोलीले वीरगञ्ज – १४ स्थित गण्डक चोकमा ना.४ ख. ९१३९ नम्बरको मालवाहक ट्रकलाई रोकेर चेकजाँच गरेको थियो ।चेकजाँच गर्ने क्रममा सूचना अनुसार नै ट्रकमा बिल विजकभन्दा बढीको सामग्री लोड रहेको भेटिएपछि नियन्त्रणमा लिइएको पर्सा प्रहरीका प्रमुख प्रहरी उपरीक्षक कोमल शालले जानकारी दिए ।

नियन्त्रणमा लिएको ट्रक र सामानको प्रहरीले अनुमानित ९५ लाख ४३ हजार १०६ रुपैया बराबरको मूल्याङ्कन गरेर थप अनुसन्धान तथा आवश्यक कारबाहीको लागि बुधवार राजश्व अनुसन्धान कार्यालय पथलैया बारामा बुझाइएको प्रहरी प्रमुख शाह ले बताए ।