वीरगंज । वीरगञ्ज मुलुकको प्रमुख भन्सार नाका वीरगञ्जबाट गएको आर्थिक वर्षमा ६६ करोड मूल्य बराबरको धान आयात भएको छ । नेपाल कृषि प्रधान देश भएपनि खाद्यान्नमा नेपाल अझै परनिर्भर रहेको यो तथ्यले पुष्टी गरेको छ । गएको आर्थिक वर्ष २०७९।०८० मा वीरगञ्ज भन्सारको बाटो भएर ६६ करोड, ४० लाख ७७ हजारको धान आयात भएको छ । यो आयात अघिल्लो आर्थिक वर्षको तुलनामा दोब्बरभन्दा बढी हो । अघिल्लो आर्थिक वर्ष २०७८।०८९ मा जम्मा ३१ करोड, ५५ लाख ६३ हजारको धान आयात भएकोमा गएको आर्थिक वर्षमा दोब्बर बढीले धानको आयात बढेको हो । गएको आर्थिक वर्षको असार मसान्तमा मात्रै वीरगञ्ज भन्सार नाकाबाट ७ करोड, ८ लाख,९०२ हजारको धान आयात भएको वीरगञ्ज भन्सार कार्यालयको अभिलेखमा उल्लेख छ ।

यद्यपि अघिल्लो आर्थिक वर्ष २०७८।०७९ मा भने असारमा जम्मा २७ लाख ८ हजारको मात्रै धान आयात भएको थियो ।धानको तुलनामा चामलको आयात भने वीरगञ्ज भन्सार नाकाबाट घटेको छ । गएको आर्थिक वर्षमा यो नाका भएर ३२ करोड, २८ लाख ९० हजारको चामल आयात भएको छ । अघिल्लो आर्थिक वर्षको तुलनामा चामल भने गत आर्थिक वर्षमा घटेको हो । अघिल्लो आर्थिक वर्षमा भने ३६ करोड, ६ लाख ८६ हजारको चामल आयात भएको थियो । गएको आर्थिक वर्षको असार महिनामा मात्रै वीरगञ्ज नाका भएर २ करोड, २८ लाख ८६ हजारको चामल आयात भएको थियो भने अघिल्लो आर्थिक वर्षको असारमा पनि २ करोड, ३१ लख ६९ हजारको चामल आयात भएको थियो ।

धान चामलसंगै वीरगञ्ज भन्सारबाट गएको आर्थिक वर्षमा ६६ करोड, ४० लाख ७ हजारको मकै आयात भएको छ । मकैको आयात पनि अघिल्लो आर्थिक वर्षको तुलनामा गत आर्थिक वर्षमा बढेको हो । अघिल्लो आर्थिक वर्षमा २२ करोड, ३५ लाख, ८३ हजारको मकैं आयात भएको थियो ।यो नाका भएर आयात हुने चौंथो नम्बरमा फापर, कोदो लगायतका खाद्यान्न रहेका छन । गत आर्थिक वर्षमा ३२ करोड, २८ लाख, ९९० हजारको फापर र कोदो आयात भएको थियो भने यो नाका भएर गत आर्थिक वर्षमा २१ करोड, ८६ लाख १८ हजारको गहुँ आयात भएको छ । यसरी नै २ करोड, ९६ सय १९ हजारको कनिका र ११ करोड, २५ लाख, ५२ हजारको जुनेलो तथा जौ आयात भएको वीरगञ्ज भन्सार कार्यालयको तथ्याङ्गमा उल्लेख छ ।