वीरगंज । असारको तेस्रो साता सकिनलाग्दा पनि देशभर धान रोपाइँ २२ प्रतिशत मात्र सकिएको छ । कृषि मन्त्रालयअन्तर्गत बाली विकास तथा कृषि जैविक विविधता संरक्षणका अनुुसार सबैभन्दा धेरै रोपाइँ सुदूरपश्चिम प्रदेशमा भएको छ । उक्त प्रदेशमा ४८ दशमलव ९ प्रतिशत भएको छ । त्यस्तै, सबैभन्दा कम धान रोपाइँ मधेस प्रदेशमा ९ दशमलव ५ प्रतिशत मात्र भएको हो । अघिल्लो वर्ष यो समयमा करिब ३० प्रतिशतसम्म रोपाइँ सम्पन्नभइसकेको थियो ।
समग्रमा हालसम्म तीन लाख २८ हजार हेक्टर जमिनमा रोपाइँ भएको छ । सरकारले यस वर्ष १४ लाख ८५ हजार हेक्टरभन्दा बढी क्षेत्रफलमा धान रोप्ने लक्ष्य राखेको छ । अघिल्लो वर्ष १४ लाख ४७ हजार हेक्टर धान रोपिएको थियो । समयमै पानी नपर्दा र मनसुन ढिलो सक्रिय हुँदा रोपाइँ कम भएको बाली विकास तथा जैविक विविधता संरक्षणका प्रवक्ता मुकुन्द भुसालले जानकारी दिए । उनले भने, ‘पानी ढिलो पर्दा कम रोपाइँ भएको हो, मधेसमा साउन अन्तिमसम्म रोपाइँ हुन्छ, त्यसैले असारसम्ममा ६५ प्रतिशतसम्म रोपाइँ भइसक्छ ।’
तथ्यांकमा मल छ, किसानलाई छैन
कृषि मन्त्रालयले पर्याप्त मल रहेको तथ्यांक सार्वजनिक गरिरहे पनि किसानलाई भने मलको चरम अभाव भइरहेको छ । अहिले पनि विभिन्न स्थानका किसानले मल नपाएर गुनासो गर्दै आइरहेको नेपाल कृषक समूह महासंघका अध्यक्ष नवराज बस्नेतले जानकारी दिए । दाङ, चितवन, नवलपरासीलगायतका स्थानबाट मल अभाव भएको गुनासो आइरहेको उनले बताए । कृषि मन्त्रालयका अनुसार हालसम्म ७८ हजार चार सय ७५ मेट्रिकटन मल मौज्दात रहेको छ ।
जसमा डिएपी १६ हजार नौ सय ९३ मेट्रिकटन रहेको छ भने युरिया ६१ हजार चार सय १२ मेट्रिकटन मौज्दात रहेको छ । अझै बाँकी रहेको २५ हजार मेट्रिकटन मल असारको अन्तिम साताभित्र आइसक्ने मन्त्रालयका सहसचिव राजेन्द्रप्रसाद मिश्रले जानकारी दिए । उनले भने ‘केही स्थानमा बाटोको समस्याका कारणले मल समयमा पुग्न नसक्दा अभाव भएको हुन सक्छ, तर हामीले विगतमा जस्तो मल अभाव हुन दिएका छैनौँ ।’