वीरगंज । सशस्त्र प्रहरीले करिब २ करोड मूल्य बराबरको भन्सार छलीका सामग्रीसहित चार वटा ट्रक नियन्त्रणमा लिएको छ । सशस्त्र प्रहरी बल नेपाल पर्साको टोलीले वीरगञ्ज महानगरपालिका वडा नम्बर ८ घण्टाघरस्थित सडकखण्डबाट शंकास्पद बिलविजक देखिएपछि चार वटा ट्रक नियन्त्रणमा लिइएको शसस्त्र प्रहरी नायब उपरीक्षक (डिएसपी) रामजंग पाण्डेले जानकारी दिए ।

डिएसपी पाण्डेकाअनुसार विशेष सूचनाको आधारमा खटिएको टोलीले ना २ ख ९४९१, ना ४ ख ८३३४, ना ३ ख ८०३९ र ना ३ ख १००९ नम्बरका चार वटा मालवाहक ट्रक नियन्त्रणमा लिइएको हो । वीरगञ्जबाट बाराको पथलैयातर्फ जाँदै गरेको अवस्थामा सोमवार बिहान १ बजेर ५० मिनेटको समयमा नियन्त्रणमा लिइएका ट्रकहरुमा क्रमशः ९५ लाख २ हजार ५ सय ५१, ५७ लाख ५६ हजार ६ सय ९२,

८४ लाख ९ हजार ३ सय ३८ र २४ लाख ६६ हजार ८ सय ७७ रुपैयाँ बराबरको सामग्री बरामद भएको डिएसपी पाण्डेले बताए । चारवटै ट्रकबाट करसहित १ करोड ९८ लाख २० हजार ३ सय १५ रुपैयाँ बराबरको सामग्री बरामद गरिएको छ । बिलबिजकभन्दा बढी र फरक सामन भएको आशंकामा नियन्त्रीत चार वटै ट्रकलाई आवश्यक अनुसन्धान र कारवाहीका लागि राजस्व अनुसन्धन कार्यालय पथलैया बारामा पठाइएको सशस्त्र प्रहरी बल नेपाल १३ नम्बर गण पर्साले जानकारी दिएको छ ।