धनुषा । धनुषामा मोटरसाइकल दुर्घटना हुँदा दुईजनाको मृत्यु भएको छ । मृत्यु हुनेमा धनुषाको बटेश्वर गाउँपालिका वडा नं. १ विजयपुरका ४० वर्षीय विनोद महतो र एक मागिखाने हिड्ने ५५ वर्षीय पुरुष रहेको प्रहरी जनाएको छ ।

सोमबार राति करिब १० बजे पूर्वपश्चिम राजमार्ग अन्तर्गत धनुषाको मिथिला नगरपालिका १० लालगढ स्थित बर्दिबास तर्फबाट महतो चलाएर आउँदै गरेको प्रदेश २–००२–०३ प ७७४३ नम्बरको मोटरसाइकल अगाडी अक्समात मागिखाने हिड्ने व्यक्ति आइपुगेपछि दुर्घटना भएको हो । दुर्घटनामा गम्भीर घाइते भएका अपरिचित मागिखाने व्यक्तिको उपचारको क्रममा प्रादेशिक अस्पताल जनकपुरमा राति १२ बजे मृत्यु भएको छ ।

गम्भीर घाइते मोटरसाइकल चालक महतोको उपचार जनकपुरमा सम्भव नभएपछि थप उपचारको लागि काठमाडौं लैजाँदै गर्दा आज बिहान ५ बजे ढल्केबर पुगेर बाटोमै मृत्यु भएको इलाका प्रहरी कार्यालय ढल्केवरले जनाएको छ । दुबैजनाको शव पोस्टमार्टमका लागि प्रादेशिक अस्पताल जनकपुरमा राखिएको र घटना विषयमा थप अनुसन्धान भइरहेको इलाका प्रहरी कार्यालय ढल्केबरका बरिष्ट सई इश्वर विक्रम साहले जानकारी दिए ।