भारत | भारतीय निर्देशक सञ्जय लीला भन्सालीको वेब सिरिज ‘हीरामन्डी’ को फर्स्ट लुक सार्वजनिक भएको छ। निर्माण टिमले फिल्मका अभिनेत्रीहरूको फर्स्ट लुक भिडिओ सार्वजनिक गरेका हुन्। सार्वजनिक भिडिओमा मनिषा कोइराला, अदिती राव हैदरी, शर्मिन सहगल, ऋचा चढ्ढा, सञ्जीदा शेख, सोनाक्षी सिन्हालाई परम्परागत शाही पोशाकमा प्रस्तुत गरिएको छ।

‘अर्को समय, अर्को युग, सञ्जय लीला भन्सालीले बनाएको अर्को जादुयी संसार जसको हिस्सा बन्न हामी पर्खन सक्दैनौं। यहाँ हीरामन्डीको सुन्दर र रोचक संसारको एक झलक,’ निर्माण टिमले भिडिओ सार्वजनिक गर्दै लेखेका छन्।

भन्साली निर्देशित पछिल्लो फिल्म ‘गंगुबाई काठियावाडी’ ले बक्स अफिसमा राम्रो व्यापार गरेको थियो। यो फिल्म सन् १९६० को दशकमा मुम्बई कमाठीपुरामा एउटा ‘वेश्यालय’ चलाउने गंगूबाईको जीवनीमा आधारित थियो।

वेब सिरिज ‘हीरामन्डी’ पनि ‘वेश्यालय’ चलाउने रानीहरूको कथामा आधारित छ। फिल्मसिटीमा ‘गंगुबाई काठियावाडी’ को सेट जहाँ बनाइएको थियो, त्यही नै ‘हीरामन्डी’ को सेट बनाइएको हो। यो सिरिज नेटफ्लिक्समा प्रदर्शन हुनेछ। तर निर्माण टिमले प्रदर्शन मिति सार्वजनिक गरेका छैनन्।