वीरगंज । काठमाण्डौमा गत पुसमा सम्पन्न नेपाल टी–२० क्रिकेट लिगमा भएको ‘स्पट फिक्सिङ’ प्रकरणमा संलग्न भएको आरोप लागेका मध्ये थप एक जना क्रिकेटर वीरगन्जबाट पक्राउ परेका छन् । उक्त प्रकरणमा सलग्न रहेको आरोप लागे ११ जना मध्ये थप एक जना क्रिकेटर वीरगन्जबाट पक्राउ परेका हुन् । वीरगन्ज महानगरपालिका वडा नम्बर १५ बसपार्क निवासी नितेश गुप्तालाई नेपाल प्रहरीको केन्द्रीय अनुसन्धान ब्यूरो (सीआईबी) ले गत आइतबार वीरगन्जबाटै पक्राउ गरेको हो । गत आइतबार काठमाण्डौबाट वीरगन्ज आएको सिआइबीको टोलीले गुप्तालाई पक्राउ गरि त्यहि दिन काठमाण्डौ लिएर गएको प्रहरी श्रोतले जनाएको छ । जिल्ला क्रिकेट संघ पर्साका अध्यक्ष दाउद अन्सारीले ‘स्पट फिक्सिङ’मा संलग्न भएको आरोपमा वीरगन्जबाट गुप्ता पक्राउ परेको खबर आफुले पनि सुनेको तर यस बारे विस्तृत जानकारी भने आफुलाई नभएको बताए ।

नेपाल क्रिकेट संघ (क्यान) का केन्द्रिय सदस्य समेत रहेका अन्सारीले भने ,‘ गुप्ता वीरगन्जको कुन टिमबाट खेल्थे त्यो मलाइ जानकारी भएन , तर सिआइबीले उनलाई पक्रेर काठमाण्डौ लगेको खबर मैले पनि सुनेको छु । पर्साका प्रहरी उपरिक्षक कोमल शाहले भने तीन दिन पहिले काठमाण्डौबाट सिआइबीको एक टोली वीरगन्ज आएको तर कुन प्रायोजनका लागि आएको बारे आफुलाइ नबताएको बताए । शाहले भने ,‘ सिआइबीको टिम वीरगन्ज आएको थियो, केहि परयो भने प्रहरीको सहयोग चाहिन्छ मात्र भन्यो , त्यसपछि मसंग कुनै सम्पर्क भएन । वीरगन्जका एक क्रिकेटररका अनुसार , पक्राउ परेका गुप्ता १२ कक्षा सम्म पढ्दा वीरगन्जको ग्लोबल कलेजको टिमबाट स्थानीय स्तरका प्रतियोगितामा खेल्ने गर्दथे । १२ कक्षा पास गरेपछि उनि भारतको दिल्लीमा गएर केहि समय क्रिकेटको प्रशिक्षण लिएर हालै वीरगन्ज फर्किएका थिए ।

सिआइबी श्रोतका अनुसार , नेपाली राष्ट्रिय क्रिकेट टिमकै एक जना क्रिकेटरसँग गुप्ताको राम्रो सम्बन्ध थियो । त्यही सम्बन्धका आधारमा गुप्ताले एक जना भारतीय नागरिकले अह्राए अनुसार राष्ट्रिय टोलीका क्रिकेटरलाई फिक्सिङका लागि ‘हिट विकेट’ गर्न एप्रोच गरेको अनुसन्धानका क्रममा खुलेको थियो । तर, राष्ट्रिय टिमका ती क्रिकेटरले सदस्यले गुप्ताको प्रस्ताव मानेका थिएनन् । बरु उनले अन्तर्राष्ट्रिय क्रिकेट कमिटी (आईसीसी) को एन्टी करप्सन युनिट (एसीयू) लाई यस बारे खबर गरेको र उनले दिएकै सूचनाका आधारमा गुप्ताको संलग्नता खुलेको ब्यूरो स्रोतले जनाएको छ । यसअघि सीआईबीले स्पट फिक्सिङमा संलग्न रहेको आरोपमा माघ १० गते राष्ट्रिय क्रिकेटर मोहम्मद आदिल आलम र पूर्वराष्ट्रिय क्रिकेटर महबुब आलमलाई पक्राउ गरेर सार्वजनिक गरिसकेको छ । सीआईबीका अनुसार फिक्सिङमा ११ जनाको संलग्नता रहेको छ ।