वीरगंज । नेपालमा एकैदिन थप ९० जनामा कोरोना भाइरस संक्रमण पुष्टि भएको छ। पछिल्लो २४ घन्टामा देशभरबाट परीक्षण गराएका ३११२ नमूनामा ९० नमूनाको परीक्षण रिपोर्ट पोजिटिभ आएको स्वास्थ्य तथा जनसंख्या मन्त्रालयले जनाएको छ।

मन्त्रालयका अनुसार पीसीआर विधिबाट १९४४ र एन्टिजेन विधिबाट ११६८ नमूनाको परीक्षण गरिएको थियो। जसमध्ये पीसीआरबाट ७३ र एन्टीजेनबाट १७ जनामा संक्रमण देखिएको हो। मंगलबार थप २० जना कोरोनामुक्त भएका छन्। आज कोरोनाबाट कसैको पनि मृत्यु नभएको मन्त्रालयले जनाएको छ। यस्तै, पछिल्लो २४ घन्टमा १ लाख ११ हजार ५३१ जनाले कोरोनाविरुद्धको खोप लगाएका छन्।

हाल ४०१ जना कोरोना सक्रिय संक्रमित रहेको मन्त्रालयले जनाएको छ। पछिल्लो एक हप्तालाई आंकलन गर्दा दैनिक ५५ जनालाई कोरोना संक्रमण देखिएको छ। कोरोना संक्रमितको संख्या बढेको भन्दै मन्त्रालयले स्वास्थ्यका मापदण्ड अपनाउन आग्रह गरेको छ। स्वास्थ्य मन्त्रालयका सचिव डा. रोशन पोखरेलले कोरोना रोकथामका लागि मास्कको समूचित प्रयोग, व्यक्तिगत सरसफाइ र भौतिक दूरी कायम गर्न आग्रह गरेका छन्।