बीरगन्ज । पर्साको बीरगन्जमा विज्ञान प्रविधि विश्वविद्यालय र सप्तरीको राजविराजमा कृषि विश्वविद्यालय तत्काल स्थापनाको तयारी प्रदेश २ सरकारले गरेको छ । यसअघि दुई आर्थिक वर्षमा नीति तथा कार्यक्रममा मात्र पर्दै आएका दुवै विश्वविद्यालयका काम यसै महिनादेखि सुरु गर्ने प्रदेश सरकारको तयारी छ ।प्रदेशका आर्थिक मामिलामन्त्री शैलेन्द्रप्रसाद साहले अध्यादेश ल्याएर दुवै विश्वविद्यालयका लागि रकम छुट्याउन लागिएको जानकारी दिए । अबको एक–दुई महिनामै रकम छुट्टयाएर विश्वविद्यालय स्थापनाको तयारी थालिने मन्त्रीले साहले जानकारी गराए । आगामी कात्तिकदेखि नै पढाई सुरु हुने लक्ष्यका साथ तयारी भईरहेको मन्त्री साहको भनाई छ ।
‘एक÷दुई दिनभित्रै तत्काल २५÷२५ करोड रुपैयाँ दिइनेछ,’ मन्त्री साहले भने, ‘यसै महिनादेखि विश्वविद्यालयका तात्कालीक पूर्वाधारको व्यवस्थापन गरिने छ ।’ दुवै विश्वविद्यालयमा आगामी कात्तिकदेखि नै पढाइ सुरु गर्ने तयारी प्रदेश सरकारको छ । राजविराजस्थित महेन्द्र विन्देश्वरी बहुमुखी क्याम्पसमै कृषि विश्वविद्यालय सञ्चालन गर्ने तयारी गरिएको र विस्तारै पूर्वाधार थपिँदै लगिने उनले जनाए । ‘अब निर्वाहमुखी नभई व्यावसायिक कृषिलाई अगाडि बढाउन सकेमात्र कृषि क्षेत्रको विकास हुन सक्छ,’ मन्त्री साहले भने, ‘कृषि प्राविधिकको पढाइसँगै अनुसन्धानका लागि कृषि विश्वविद्यालय फलदायी हुनेछ ।’
यस्तै, प्रदेश सरकारले चालु आर्थिक वर्षदेखि एक निर्वाचन क्षेत्र ५ किलोमिटर कालोपत्रे सडक निर्माणको कार्यलाई प्राथमिकताका साथ अगाडि बढाउने आर्थिक मन्त्री साहको योजना छ । बहुवर्षीय योजनामा राखेर यस वर्षदेखि एक निर्वाचन क्षेत्र ५ किलोमिटर पक्की सडक निर्माण कार्यको टेन्डर सुरु गरिने साहले जनाए ।उनले प्रदेशका गौरवका आयोजनाहरूको कामलाई द्रुत गतिमा अगाडि बढाउन प्रदेश सरकारले आवश्यक सबै कदम चाल्ने बताउँदै मधेस स्वास्थ्य विज्ञान प्रतिष्ठानमा जनशक्ति तथा आवश्यक पूर्वाधार व्यवस्थित गरिने जनाए । प्रदेश सरकारसँग नागरिकको ठूलो अपेक्षा रहेको बताउँदै मन्त्री साहले वित्तीय अनुशासन कायम गर्नु अहिलेको चुनौती रहेको बताए । ‘सामान्य परिस्थितिमा बनेको सरकार होइन, आन्दोलनको उपलब्धिपछि सरकार निर्माण भएको हो,’ साहले भने ।
