वीरगन्ज । आर्थिक वर्ष २०७७/०७८ भर कुल ५५ लाख ८१ हजार ७७९ पटक क्यूआर कोड स्क्यान गरिएको छ । नेपाल राष्ट्र बैंकले हालै प्रकाशित गरेको देशको वर्तमान आर्थिक तथा वित्तीय स्थिति प्रतिवेदनले क्यूआर कोड भुक्तानी बढ्दै गएको देखाएको हो ।प्रतिवेदन अनुसार गएको असार महिनामा मात्रै भुक्तानीका लागि आठ लाख ५५ हजार ५६६ पटक क्यूआर कोड स्क्यान भएको छ, जुन अहिलेसम्मकै उच्च हो ।

पछिल्लो समय क्यूआर कोड स्क्यान गरी गर्ने भुक्तानी निकै सहज र सुविधाजनक हुन थालेको छ । जसलाई नगद कारोबार प्रतिस्थापन गरी डिजिटल भुक्तानी अपनाउने कार्यमा समेत निकै सहज माध्यमको रुपमा हेर्न थालिएको छ ।क्यूआर भुक्तानीको लोकप्रियतासँगै हरेकजसो वालेट र मोबाइल बैंकिङ सेवामा समेत क्यूआर कोड अनिवार्य जस्तै बनेको छ ।