वीरगन्ज । चालू आर्थिक वर्षको साउनमा मलुकभर ३ हजार ९१६ अपराधका घटना भएको छ ।प्रहरी प्रधान कार्यालयका अनुसार सबैभन्दा बढी सामाजिक अपराधका ८९१, ज्यानसम्बन्धीका ७१८, आत्महत्याका ५०२, चोरीका २९६, संगठित/आर्थिक अपराधका ५४४, महिला बालबालिका विरुद्ध ४६६, सवारीसम्बन्धी १३२ मुद्दा दर्ता भएको छ ।

१ महिनाको प्राप्त तथ्यांक अनुसार दैनिक १२६ आपराधिक घटना भएको छ ।यसैगरी हातहतियार तथा खरखजानासम्बन्धी २५, बाल यौन दुराचारका २५, अपहरण वा शरीर बन्धकका १४, मानव बेचबिखन तथा ओसारपसारका १७ मुद्दा दर्ता भएको जनाइएको छ । गत साउन महिनामा दर्ता भएका कूल ३ हजार ९१६ आपराधिक घटनामा ४ हजार ९०२ अभियुक्त संलग्न रहेका छन् ।अपराधमा संलग्नमध्ये ३ हजार ७१६ पक्राउ परेका छन् । १ हजार १८६ फरार छन् । १ महिनामा अदालतबाट सजाय तोकिएका १ हजार ११९ फरार प्रतिवादी पक्राउ परेका छन् ।उनीहरूबाट जरिवानाबापत ११ करोड ३० लाख ४९ हजार रुपैयाँ असुल भएको छ । १ महिनामा कूल ३६ करोड ४७ लाख ६५ हजार राजस्व संकलन भएको प्रहरी प्रवक्ता प्रहरी वरिष्ठ उपरीक्षक वसन्तबहादुर कुँवरले जानकारी दिए ।

१ महिनामा १ हजार ८१८ सवारी दुर्घटनामा १६० जनाको मृत्यु भएको छ भने ५४० गम्भीर घाइते भएका छन् । औसतमा प्रतिदिन ५८ सवारी दुर्घटना भएको तथ्यांकले देखाएको छ ।

१ महिनामा कूल ३६१ लागूऔषधसम्बन्धी मुद्दा दर्ता भएकोमा ५५६ मानिस पक्राउ परेका छन् भने ३३५ किलो गाँजा र १९ किलो चरेश बरामद भएको छ । ५८ हतियार, ९७ राउण्ड गोली र ६ थान म्यागजिन बरामद गरिएको छ ।अवैध हातहतियारसहित ३९ जना पक्राउ परेका छन् । साउन महिनामा ४३९ विपद्का घटनामा २३ जनाले ज्यान गुमाएका छन् भने ६९ जना घाइते भएका छन् ।
प्रहरी कर्मचारीविरुद्ध ४८ वटा उजुरी दर्ता भएकोमा १३ उजुरी फछ्र्यौट भएका छन् । कूल २०२ प्रहरी कर्मचारी विभागीय कारबाहीमा परेका प्रहरीले जनाएको छ ।