वीरगन्ज । जनता समाजवादी पार्टी (जसपा) नेपाल विभाजनको अवस्थामा पुगेपछी प्रदेश नम्बर २ सरकार संकटमा परेको छ। जसपाको नेतृत्वमा रहेको सरकार पार्टी विभाजन हुँदा ढल्ने खतरा छ। त्यहाँका मुख्यमन्त्री लालबाबु राउत उपेन्द्र खेमाका हुन्।
सरकार संकटमा परेपछी पार्टी अध्यक्ष उपेन्द्र यादवले राजनीतिक दौडधुप शुरु गरेका छन्। जसपा पक्षका सांसदहरु सरकारबाट बाहिरिएपछी सरकार जोगाउन आवश्यक सांसद संख्या पुर्याउन उपेन्द्रको सकृयता बढेको हो। यसैविच उनले नेपाली काँग्रेसका उपसभापती विमलेन्द्र निधिसँग छलफल गरेका छन्।
छलफलका क्रममा निधिले काँग्रेस संसदीय दलका नेता रामसरोज यादवलाई मुख्यमन्त्री बनाउनुपर्ने अडान राखेको जसपा निकट श्रोतले बताएको छ। तर, यादवले भने पहिला सरकारमा सहभागी हुन आग्रह गर्दै मुख्यमन्त्रीको विषयमा पछी कुरा गर्न भनेका थिए। दुई विचको छलफलबाट कुनै निष्कर्ष भने ननिस्कीएको श्रोतले बतायो।
प्रदेशमा कुल १ सय ७ सांसद रहेकोमा नेकपा माओवादी केन्द्रले ३ जनालाई कारबाही गरेपछि अहिले सांसदको संख्या १ सय ४ छ। सत्तारुढ जसपासँग ५५ सांसद छ, जसमा ३० तत्कालीन समाजवादी र २५ जना तत्कालीन राजपा पक्षका हुन्।
यसैगरी नेकपा एमालेको कुल २१ सांसद मध्ये १३ जना माधव नेपाल र ८ जना केपी ओली पक्षमा छन्। नेपाली काँग्रेसका १९, नेकपा माओवादी केन्द्रका ७ र नेपाल संघीय समाजवादी पार्टीका एक जना सांसद छन्।
आफ्नो नेतृत्वको सरकार जोगाउन अध्यक्ष यादवले काँग्रेस र माओवादी केन्द्रको समर्थन जुटाउने प्रयास गरिरहेका छन्। यादव पक्ष काँग्रेस र माओवादी केन्द्रसँग मिलेर सरकार बनाउने तयारीमा जुटेको छ। यादवले विहीबार काँग्रेस सभापति शेरबहादुर देउवासँग पनि भेटर यस विषयमा छलफल गरेका थिए। माओवादी केन्द्रले भने लालबाबु राउत नेतृत्वको सरकारलाई समर्थन जनाउने बताइसकेको छ।
