वीरगन्ज । कोरोना भाइरसबाट नराम्ररी प्रभावित बनेको नेपाललाई खोप उपलब्ध गराउनका लागि राष्ट्रपति विद्यादेवि भण्डारीले सक्रियता बढाएकी छन् ।उनले खोप उत्पादक देशका समकक्षीलाई पत्राचार गरेर नेपालका लागि खोप उपलब्ध गराइदिन आग्रह गर्दै आएकी छन् । सुरुमै भारतीय समकक्षी रामनाथ कोविन्दलाई भण्डारीले खोप उपलब्ध गराइदिनका लागि पत्राचार गरेकी थिइन् । तर, भारतीय राष्ट्रपतिले यसको कुनै प्रतिक्रिया दिएका छैनन् ।
चिनियाँ राष्ट्रपति सीले भने तत्कालै प्रतिक्रिया दिँदै १० लाख डोज खोप अनुदानमा उपलब्ध गराउने घोषणा गरे । जसअनुसार आइतबार दुई लाख डोज खोप आइसकेको छ ।बाँकी आठ लाख डोज खोपका लागि नेपाल वायु सेवा निगमको वाइडबडी जहाज भोलि राति ११ बजे चीनतर्फ प्रस्थान गर्दैछ । चीनले यसअघि नै आठ लाख डोज खोप अनुदानमा दिइसकेको छ ।
चीनबाट वाइडबडीे आठ लाख डोज खोपसहित मंगलबार दिउँसो नेपालतर्फ प्रस्थान गर्ने भएको छ । यस्तै, राष्ट्रपति भण्डारीले अमेरिकी राष्ट्रपतिसँग पनि खोप उपलब्धताका लागि अनुरोध गर्दै पत्राचार गरेकी छन् ।शनिबार उक्त पत्र अमेरिकी राष्ट्रपतिका सेक्रेटेरीलाई अमेरिकाका लागि नेपाली राजदूत डा. युवराज खतिवडाले पत्र पडाएका छन् । अमेरिकी राष्ट्रपति कार्यालयले पनि सक्दो सहयोग गर्ने वचन दिएको छ ।
खोप अभावका कारण नेपालमा पहिलो डोज लगाएकाले पनि दोस्रो डोज पाउन सकेका छैनन् । एसियामै खोप अभियान सञ्चालन गर्ने नेपाल दोस्रो मुलुक भए पनि दोस्रो डोज नपाउँदा खोप अभियान नै रोकिएको छ ।यस्तै, आइतबार राष्ट्रपति भण्डारीले खोप उत्पादक मुलुक बेलायतलाई पनि खोप उपलब्ध गराइदिन अनुरोध गर्दै पत्राचार गरेकी छन् । राष्ट्रपति भण्डारीले बेलायती महारानी एलिजाबेथ द्धितियालाई सम्बोधन गर्दै खोप सहायता उपलब्ध गराइदिन अनुरोध गरेकी हुन् ।
लन्डन दूतावासका अनुसार राष्ट्रपतिको पत्रलाई आइतबार बेलायती बिदेश मन्त्रालयमा बुझाइएको छ । यस्तै, आइतबार नै राष्ट्रपति भण्डारीले खोप कूटनीति अन्तर्गत रुसि राष्ट्रपति भ्लादिमिर पुटिनलाई पनि पत्रार गरेकी छिन् ।सरकारले पनि खोपका साथै अन्य स्वास्थ्य सहायताका लागि प्रभावित नबनेका मुलुकहरुलाई यसअघि नै कूटनीतिक नियोगमार्फत सहयोग माग गरेको छ ।
